ന്യൂഡല്‍ഹി: അണ്ടര്‍ 17 ലോകകപ്പില്‍ പ്രിക്വാര്‍ട്ടര്‍ കാണാതെ ഇന്ത്യ പുറത്ത്.
ആഫ്രിക്കന്‍ വമ്പന്‍മാരായ ഘാനയോട് എതിരില്ലാത്ത നാലു ഗോളുകള്‍ക്കു തോല്‍വി ഏറ്റുവാങ്ങിയത്. പ്രീക്വാര്‍ട്ടര്‍ പ്രതീക്ഷ നിലനിര്‍ത്താന്‍ ഘാനയെ ചുരുങ്ങിയത് നാലു ഗോളിനെങ്കിലും പരാജയപ്പെടുത്തണമായിരുന്നു.
നായകന്‍ എറിക് ഐഹായുടെ ഇരട്ടഗോളും പകരക്കാരന്‍ എറിക് ഡാന്‍സോ, ഇമ്മാനുവല്‍ ടോകു എന്നിവരുടെ ഗോളുകളും ഇന്ത്യന്‍ പ്രതീക്ഷകള്‍ കരിച്ചുകളഞ്ഞു. 43, 52 മിനിറ്റുകളിലായിരുന്നു ഐഹായുടെ ഗോളുകള്‍.
ഇതിനുശേഷവും പൊരുതി നിന്ന ഇന്ത്യയെ രണ്ടു മിനിറ്റിന്റെ ഇടവേളയില്‍ നേടിയ രണ്ടു ഗോളുകളിലൂടെ ഘാന തകര്‍ത്തുകളഞ്ഞു.
85-ാം മിനിറ്റില്‍ ഡാന്‍സോയും 86-ാം മിനിറ്റില്‍ ടോകുവും ഇന്ത്യന്‍ പ്രതിരോധത്തിലെ പിഴവുകള്‍ മുതലെടുത്തു വലകുലുക്കി. ഇതോടെ ഘാന പ്രീക്വാര്‍ട്ടര്‍ ഉറപ്പിച്ചു.
ആദ്യ രണ്ട് കളികളില്‍ അമേരിക്കയോടും കൊളംബിയയോടും തോറ്റിരുന്നു. മൂന്നാം തോല്‍വിയോടെ ഇന്ത്യ ടൂര്‍ണമെന്റില്‍ നിന്നു പുറത്തായി.
