കറാച്ചി: സാങ്കേതികതകരാര്‍ കാരണമാണ് മിസൈല്‍ പാകിസ്താന്‍ പ്രദേശത്ത് പതിച്ചത് എന്ന ഇന്ത്യയുടെ പ്രസ്താവന ശ്രദ്ധയില്‍പ്പെട്ടിട്ടുണ്ടെന്ന് പാക് വിദേശകാര്യ മന്ത്രാലയ വക്താവ് അറിയിച്ചു. സംഭവത്തില്‍ ഇന്ത്യ ഖേദപ്രകടനവും നടത്തിയിരുന്നു. എന്നാല്‍ ഇത് തൃപ്തികരമല്ലെന്നാണ് പാകിസ്താന്റെ നിലപാട്. തുടര്‍ന്നാണ് ഉന്നതതല കോടതി അന്വേഷണത്തിന് പാകിസ്താന്‍ ഉത്തരവിട്ടിരിക്കുന്നത്.
ഇന്ത്യന്‍ നിര്‍മിത മിസൈല്‍ പാകിസ്താന്‍ വ്യോമാതിര്‍ത്തി ലംഘിച്ച വിഷയത്തില്‍ ഉന്നതതല കോടതി അന്വേഷണത്തിന് ഉത്തരവിട്ട് പാകിസ്താന്‍. തന്ത്രപ്രധാനമായ ആയുധങ്ങള്‍ ഇന്ത്യ കൈകാര്യം ചെയ്യുന്നതിലെ ഗുരുതരമായ വീഴ്ചയാണ് സംഭവം സൂചിപ്പിക്കുന്നതെന്നും വസ്തുതകള്‍ കൃത്യമായി പുറത്തുവരാന്‍ സംയുക്ത അന്വേഷണം വേണമെന്നും ആവശ്യപ്പെട്ടു. അബദ്ധവശാല്‍ സംഭവിച്ചതാണെന്ന ഇന്ത്യയുടെ മറുപടി സംഭവത്തെ നിസാരവത്കരിക്കുന്നതാണെന്നും തൃപ്തികരമല്ലെന്നും പാകിസ്താന്‍ വക്താവ് പറഞ്ഞു.
