കൊച്ചി: ഇടപ്പള്ളിയില് മാളിലെ ഹൈപ്പര്മാര്ക്കറ്റില് നടിയെ അപമാനിച്ച കേസിലെ പ്രതികളുടെ ചിത്രങ്ങള് പൊലീസ് പുറത്തുവിട്ടു. മെട്രോ സ്റ്റേഷനിലെ സിസിടിവിയില് നിന്നുള്ള ദൃശ്യങ്ങളാണ് പുറത്തുവിട്ടത്. ഇവര് മാളിലെ പ്രവേശന കവാടത്തില് ഫോണ് നമ്പര് നല്കാതെ കബളിപ്പിച്ച് അകത്തു കടന്നതിനാല് അതു വഴിയുള്ള അന്വേഷണവും മുടങ്ങിയതോടെയാണ് ചിത്രങ്ങള് പുറത്തു വിടാന് പൊലീസ് തീരുമാനിച്ചത്.
പ്രതികളുടെ ദൃശ്യങ്ങള് കഴിഞ്ഞ ദിവസം സിസിടിവിയില് നിന്നു പൊലീസിനു ലഭിച്ചിരുന്നു. ഇവര് പ്രായപൂര്ത്തി ആയവരാണോ എന്നു സംശയിക്കുന്നതിനാല് ചിത്രങ്ങള് പുറത്തു വിടാതിരിക്കാനായിരുന്നു പൊലീസ് തീരുമാനം.
ഇതിനിടെ വനിതാ കമ്മിഷനും യുവജന കമ്മിഷനും പൊലീസിനോടു റിപ്പോര്ട്ട് തേടി. ഈ സാഹചര്യത്തിലാണ് ചിത്രങ്ങള് പുറത്തു വിടാനുള്ള പൊലീസ് തീരുമാനം.