കൊച്ചി: ‘നവകേരള സദസ്സിന്റെ ഭാഗമായുള്ള നവകേരള യാത്ര എറണാകുളത്തുനിന്ന് വൈപ്പിനിലേക്ക് കൊച്ചി വാട്ടര് മെട്രോയില് യാത്ര ചെയ്തത് തികച്ചും വ്യത്യസ്തമായ അനുഭവമായി. കൊച്ചി വാട്ടര് മെട്രോയ്ക്ക് ആശംസകള്…’ കൊച്ചി വാട്ടര് മെട്രോ യാത്രയ്ക്കിടയില് മുഖ്യമന്ത്രി സന്ദര്ശക ഡയറിയില് കുറിച്ചു. അതേസമയം, വാട്ടര് മെട്രോയിലെ ആദ്യയാത്ര സെല്ഫിയാക്കുകയായിരുന്നു മറ്റ് മന്ത്രിമാര്.
വൈപ്പിന് മണ്ഡലത്തിലെ നവകേരള സദസ്സില് പങ്കെടുക്കുന്നതിനാണ് വാട്ടര് മെട്രോ ഹൈക്കോര്ട്ട് ജങ്ഷന് ടെര്മിനലില് നിന്ന് വൈപ്പിന് ടെര്മിനലിലേക്ക് മുഖ്യമന്ത്രിയും മന്ത്രിമാരും യാത്രചെയ്ത്. വാട്ടര് മെട്രോയുടെ നീല തൊപ്പിയണിഞ്ഞാണ് മുഖ്യമന്ത്രി ഉള്പ്പെടെ എല്ലാവരും കൊച്ചിക്കായലിലൂടെ യാത്ര നടത്തിയത്.കലൂര് ഐ.എം.എ ഹൗസില് നടന്ന പ്രഭാതയോഗത്തിന് ശേഷമാണ് മുഖ്യമന്ത്രിയുടെ നേതൃത്വത്തില് മന്ത്രിമാര് വാട്ടര് മെട്രോയില് യാത്രചെയ്തത്. വാട്ടര് മെട്രോയുടെ പ്രവര്ത്തനങ്ങള് കെ.എം.ആര്.എല്. ഉദ്യോഗസ്ഥര് വിശദീകരിച്ചു. വാട്ടര് മെട്രോയുടെ മാതൃക മന്ത്രിസഭയ്ക്ക് സമ്മാനിച്ചാണ് സംഘത്തെ വൈപ്പിനിലേക്ക് യാത്രയാക്കിയത്.
കേരളത്തിന്റെ അഭിമാനമായ കൊച്ചി വാട്ടര് മെട്രോയില് മുഖ്യമന്ത്രി പിണറായി വിജയനും മന്ത്രിമാരും യാത്രചെയ്തു. മുഖ്യമന്ത്രി ഉള്പ്പെടെ ഭൂരിപക്ഷം മന്ത്രിമാരും ആദ്യമായാണ് വാട്ടര് മെട്രോയില് യാത്രചെയ്തത്. മന്ത്രിമാരായ പി. രാജീവ്, ആന്റണി രാജു എന്നിവര് മാത്രമാണ് മുന്പ് യാത്രചെയ്തിട്ടുള്ളത്.