ലണ്ടന്‍: ഇന്ത്യന്‍ വംശജനെ ലണ്ടനിലെ മാളില്‍വെച്ച് കഴുത്തറുത്ത് കൊലപ്പെടുത്തി. ഹൈദരാബാദ് സ്വദേശിയായ മുഹമ്മദ് നദീമുദ്ദീന്‍ എന്ന യുവാവാണ് ദാരുണമായി കൊല്ലപ്പെട്ടത്.
വെല്ലിങ്ടണ്‍ സ്ട്രീറ്റിലെ ടെസ്‌കോ സൂപ്പര്‍മാര്‍ക്കറ്റിലെ ജീവനക്കാരനായ നദീമുദ്ദീനെ പാര്‍ക്കിങ് ഏരിയയിലാണ് കൊല്ലപ്പെട്ട നിലയില്‍ കണ്ടെത്തിയത്. ജോലി സമയം കഴിഞ്ഞിട്ടും നദീമുദ്ദീന്‍ വീട്ടിലെത്താതിനെ തുടര്‍ന്ന് നടത്തിയ തെരച്ചിലിലാണ് പാര്‍ക്കിങ് ഏരിയയില്‍ കൊല്ലപ്പെട്ട നിലയില്‍ സുരക്ഷ ജീവനക്കാരന്‍ കണ്ടത്. തുടര്‍ന്ന് പൊലീസിനെ വിവരമറിയിച്ചു.
2012ലാണ് നദീമുദ്ദീന്‍ ലണ്ടനിലെത്തിയത്. തുടര്‍ന്ന് സൂപ്പര്‍മാര്‍ക്കറ്റില്‍ ജോലിക്ക് കയറി. പിന്നീട് കുടുംബവും ലണ്ടനിലേക്ക് പോയി. 25 ദിവസങ്ങള്‍ക്ക് മുമ്പാണ് നദീമുദ്ദീന്റെ ഗര്‍ഭിണിയായ ഭാര്യ ലണ്ടനില്‍ എത്തിയത്. ഇവര്‍ ഡോക്ടറാണ്.നദീമുദ്ദീന്റെ മൃതദേഹം ലണ്ടനില്‍ സംസ്‌കരിക്കും. സംസ്‌കാര ചടങ്ങുകളില്‍ പങ്കെടുക്കുന്നതിനായി ഹൈദരാബാദിലെ അടുത്ത ബന്ധുക്കള്‍ ലണ്ടലിലേക്ക് പോകും. ഇതിനായി വിദേശകാര്യ മന്ത്രാലയത്തിന്റെയും തെലങ്കാന സര്‍ക്കാറിന്റെയും സഹായം തേടിയിട്ടുണ്ട്.
ഇതേ സൂപ്പര്‍മാര്‍ക്കറ്റില്‍ ജോലി ചെയ്യുന്ന പാകിസ്താന്‍ സ്വദേശിയായ യുവാവാണ് കൊലപാതകത്തിന് പിന്നില്ലെന്ന് സംശയിക്കുന്നതായി പൊലീസ് അറിയിച്ചു.
