ജിദ്ദ: നിലവിലെ ഭര്‍ത്താവിനെ ഒഴിവാക്കി കുറച്ചുകൂടി നല്ല ഒരാളെ വിവാഹം കഴിക്കാന്‍ സുഹൃത്തിനെ ഉപദേശിച്ച സൗദി വനിതയ്ക്ക് കിട്ടിയത് എട്ടിന്റെ പണി. സുഹൃത്തിന്റെ ഉപദേശവും കൗണ്‍സലിംഗും വിശ്വസിച്ച് യുവതി തന്റെ ഭര്‍ത്താവിനെ ഉപേക്ഷിച്ചതോടെയാണിത്. ഭാര്യയുടെ വനിതാ സുഹൃത്താണ് തങ്ങളെ തമ്മില്‍ തെറ്റിച്ചതെന്നും അവരുടെ പ്രേരണ പ്രകാരമാണ് കാര്യങ്ങള്‍ വിവാഹമോചനത്തിലേക്ക് എത്തിയതെന്നും കാണിച്ച് ഭര്‍ത്താവ് കോടതിയെ സമീപിക്കുകയായിരുന്നു.
കേസില്‍ വാദം കേട്ട ജിദ്ദ ക്രിമിനല്‍ കോടതി ഉപദേശം നല്‍കിയ സുഹൃത്തിന് 50,000 റിയാല്‍ പിഴയാണ് വിധിച്ചത്. തന്റെ ഉപദേശം കാരണം ഭാര്യയെ നഷ്ടമായ ഭര്‍ത്താവിന് നഷ്ടപരിഹാരമായാണ് ഈ തുക നല്‍കേണ്ടതെന്നും കോടതി ഉത്തരവിട്ടു. അതോടൊപ്പം എന്ത് ഉദ്ദേശ്യത്തോടെയാണെങ്കിലും വിവാഹിതയായ സ്ത്രീകള്‍ക്ക് ഇത്തരം ഉപദേശങ്ങള്‍ താന്‍ ഇനിമേല്‍ നല്‍കില്ലെന്ന് കോടതിയില്‍വച്ച് യുവതിയെ കൊണ്ട് ജഡ്ജി പ്രതിജ്ഞ എടുപ്പിക്കുകയുമുണ്ടായി. അപൂര്‍വമായ വിധിയെന്നാണ് സൗദിയിലെ അഭിഭാഷകര്‍ ഇതിനെ വിശേഷിപ്പിക്കുന്നത്.
തന്നെ അനുസരിക്കേണ്ടതില്ലെന്നും തന്നെ ഒഴിവാക്കി മറ്റൊരാളെ വിവാഹം ചെയ്യണമെന്നും ഭാര്യയുടെ സുഹൃത്ത് നിരന്തരമായി ഉപദേശിക്കാറുണ്ടായിരുന്നുവെന്ന് ഭര്‍ത്താവ് കോടതിയെ അറിയിച്ചു. അവരുടെ കൗണ്‍സലിംഗ് കാരണമാണ് ഭാര്യ തന്നെ അനുസരിക്കാതായത്. ആരുടെയും മുമ്പില്‍ കീഴടങ്ങി ജീവിക്കേണ്ട ആവശ്യമില്ലെന്നായിരുന്നു സുഹൃത്തിന്റെ ഉപദേശം. ഞങ്ങളുടെ വിവാഹജീവിതം തകര്‍ത്തത് സുഹൃത്തിന്റെ ഉപദേശമാണ് എന്നും ഇയാള്‍ കോടതിയെ ബോധിപ്പിച്ചു. എന്നാല്‍ നല്ല ഉദ്ദേശ്യത്തോടെയാണ് താന്‍ വിവാഹിതയായ സുഹൃത്തിന് ഇത്തരമൊരു ഉപദേശം ന്‍കിയതെന്നായിരുന്നു യുവതിയുടെ വാദം. പക്ഷെ, ഇത് അംഗീകരിക്കാന്‍ കോടതി വിസമ്മതിക്കുകയായിരുന്നു. സുഹൃത്തുക്കളുടെ ഉപദേശങ്ങള്‍ സ്വീകരിക്കുന്നതിന് മുമ്പ് ഗൗരവത്തോടെ ആലോചിച്ചു വേണമെന്നും പല സ്ത്രീകളും അസൂയയ്ക്കു പുറത്ത് ഇത്തരം കൗണ്‍സലിംഗുകള്‍ നല്‍കുമെന്നും ഭാര്യയെ ഉപദേശിച്ചാണ് കോടതി കേസ് അവസാനിപ്പിച്ചത്.
