തിരുവനന്തപുരം : മിന്നലോടു കൂടിയ ശക്തമായ മഴയ്ക്കും ശക്തമായ കാറ്റിനും സാധ്യതയുള്ളതിനാല് മലപ്പുറം ജില്ലയില് മഞ്ഞ അലര്ട്ട് പ്രഖ്യാപിച്ചു. ശക്തമായ മഴ, പെട്ടന്നുള്ള വെള്ളപ്പൊക്കം, ഉരുള്പ്പൊട്ടല്, മണ്ണിടിച്ചില് എന്നിവ ഉണ്ടാകാന് സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു. നാളെ (20-04-19) പാലക്കാട് ജില്ലയില് ശക്തമായ മഴയ്ക്ക് സാധ്യതയുണ്ടെന്ന മുന്നറിയിപ്പിന്റെ അടിസ്ഥാനത്തില് യെല്ലോ അലര്ട്ട് പ്രഖ്യാപിച്ചിരിക്കുകയാണ്.
അഞ്ച് ജില്ലകളില് ഉരുള്പൊട്ടല് സാധ്യത ഉള്ളതിനാല് രാത്രി സമയത്ത് മലയോരമേഖലയിലേക്കുള്ള യാത്ര ഒഴിവാക്കണമെന്നും
പുഴകളിലും മറ്റും വെള്ളം ഉയരാന് സാധ്യതയുള്ളതിനാല് വെള്ളത്തിലിറങ്ങരുതെന്നും അറിയിപ്പുണ്ട്. മലപ്പുറം, പാലക്കാട്, വയനാട്, കോഴിക്കോട്, തൃശ്ശൂര് എന്നീ ജില്ലകളിലാണ് ഉരുള്പൊട്ടാന് സാധ്യതാ മുന്നറിയിപ്പുള്ളത്.
വേനല് മഴയോടനുബന്ധിച്ച് ഉച്ചയ്ക്ക് 2 മുതല് വൈകിട്ട് 8 വരെ അടുത്ത 5 ദിവസം ശക്തമായ മിന്നലിനു സാധ്യതയുണ്ടെന്ന് സംസ്ഥാന ദുരന്തനിവാരണ അതോറിറ്റി മുന്നറിയിപ്പു നല്കിയിട്ടുണ്ട്.