എറണാകുളം: എറണാകുളം രാജഗിരി ആശുപത്രിയില് മസ്തിഷ്ക മരണം സംഭവിച്ച യുവാവിന്റെ ഹൃദയവും വഹിച്ച് കൊണ്ടുള്ള വാഹനം കോഴിക്കോട് മെട്രോ ഇന്റര്നാഷണല് ആശുപത്രിയിലേക്ക് പുറപ്പെട്ടു. കോട്ടയം വടവത്തൂര് കളത്തില്പടി ചിറത്തിലത്ത് ഏദന്സിലെ നേവിസിന്റെ (25) ഹൃദയമാണ് കോഴിക്കോട് ചികിത്സയിലുള്ള രോഗിക്കുവേണ്ടി കൊണ്ടുപോകുന്നത്.
എത്രയും വേഗം ഹൃദയം എത്തിക്കണം. ഓരോ നിമിഷവും പ്രധാനമാണ്. അവയവദാന പ്രക്രിയയ്ക്കും സുഗമമായ യാത്രയ്ക്കും വേണ്ട ക്രമീകരണങ്ങളെല്ലാം സര്ക്കാര് ഒരുക്കിയതായി ആരോഗ്യമന്ത്രി അറിയിച്ചു. മുഖ്യമന്ത്രിയുടെ നിര്ദേശാനുസരണം പൊലീസ് ഉദ്യോഗസ്ഥര് ഗതാഗത ക്രമീകരണമൊരുക്കുന്നുണ്ട്.
ഫ്രാന്സില് അക്കൗണ്ടിംഗ് മാസ്റ്ററിന് പഠിക്കുകയായിരുന്നു നേവിസ്. കൊവിഡ് കാരണം ഓണ്ലൈനായി നാട്ടില് നിന്നുമായിരുന്നു പഠനം. കഴിഞ്ഞ 16ന്് രാത്രി പഠനം കഴിഞ്ഞ് ഉണരാന് വൈകിയ നേവിസിനെ സഹോദരി വിസ്മയ വിളിച്ചുണര്ത്താന് ചെന്നപ്പോള് അബോധാവസ്ഥയില് കിടക്കുന്നത് കണ്ടത്. ഉടന് തന്നെ കോട്ടയം കാരിത്താസ് ആശുപത്രിയില് എത്തിക്കുകയായിരുന്നു. രക്തത്തിലെ പഞ്ചസാരയുടെ അളവ് ക്രമാതീതമായി താഴ്ന്നതുമൂലമുള്ള പ്രശ്നമായിരുന്നു.
ആരോഗ്യ നിലയില് വലിയ മാറ്റം വരാത്തതിനാല് 20ന് എറണാകുളം രാജഗിരി ആശുപത്രിയില് എത്തിച്ചു. ഇന്നലെ മസ്തിഷ്ക മരണം സ്ഥിരീകരിച്ചതോടെ നേവിസിന്റെ അച്ഛനും അമ്മയും സ്വമേധയാ അവയവദാനത്തിന് മുന്നോട്ട് വരികയായിരുന്നു. ഹൃദയം, കരള്, കൈകള്, രണ്ട് വൃക്കകള്, കണ്ണുകള് എന്നിവയാണ് ദാനം ചെയ്തത്. കേരള സര്ക്കാരിന്റെ മരണാന്തര അവയവദാന പദ്ധതിയായ മൃതസഞ്ജീവനി (കെ.എന്.ഒ.എസ്.) വഴിയാണ് അവയവദാന പ്രക്രിയ നടത്തിയത്.