ന്യൂഡല്‍ഹി : റഫാല്‍ വിമാനം വാങ്ങാതിരുന്നതിന് മുന്‍ സര്‍ക്കാരുകളെ കുറ്റപ്പെടുത്തിയ പ്രധാനമന്ത്രി നരേന്ദ്രമോദിക്ക് മറുപടിയുമായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി.
പ്രധാനമന്ത്രിക്കു നാണമില്ലേ?. റഫാൽ വിമാനം ഇന്ത്യയിലെത്താൻ വൈകുന്നതിനു കാരണം പ്രധാനമന്ത്രി മാത്രമാണ്. കാലഹരണപ്പെട്ട വിമാനം സൈന്യം ഉപയോഗിക്കാൻ കാരണം മോദിയാണ്-രാഹുൽ ആരോപിച്ചു.
നിങ്ങള്‍ 30,000 കോടി മോഷ്ടിച്ച്‌ സുഹൃത്തായ അനില്‍ അംബാനിക്ക് നല്‍കി. റഫാല്‍ വിമാനം വൈകാന്‍ കാരണം പ്രധാനമന്ത്രി മാത്രമാണ്. കാലഹരണപ്പെട്ട വിമാനങ്ങള്‍ പറത്തി വിംഗ് കമാന്‍ഡര്‍ അഭിനന്ദന്‍ വര്‍ധമാനെ പോലുള്ളവര്‍ എന്തിന് ജീവന്‍ പണയം വയ്ക്കണമെന്നും രാഹുല്‍ ചോദിച്ചു.
റഫാൽ വിമാനങ്ങൾ കൂടി ഇന്ത്യയ്ക്കുണ്ടായിരുന്നെങ്കിൽ രാജ്യത്തിനു കുറച്ചുകൂടി നേട്ടമാകുമായിരുന്നെന്നു ശനിയാഴ്ച പ്രധാനമന്ത്രി പറഞ്ഞിരുന്നു. റഫാലിന്റെ കുറവു രാജ്യം അറിയുന്നുണ്ട്. റഫാൽ കരാറില്‍ അഹന്തയുടെ രാഷ്ട്രീയമാണു രാജ്യത്തെ അപായപ്പെടുത്തിയതെന്നും പ്രധാനമന്ത്രി പറഞ്ഞു. ഇതിനു മറുപടിയായിരുന്നു രാഹുലിന്റെ ട്വീറ്റ്.
