ന്യൂഡല്‍ഹി: മാധ്യമങ്ങള്‍ക്കെതിരേ വിമര്‍ശനവുമായി ബോളിവുഡ് നടി അനുഷ്ക ശര്‍മ രംഗത്ത്. തന്റെ പുതിയ ചിത്രം ഫില്ലൗരി നിര്‍മിക്കുന്നത് വിരാട് കോഹ്ലിയാണെന്ന റിപ്പോര്‍ട്ടുകള്‍ക്കെതിരേയാണ് നടി വിമര്‍ശനമുന്നയിച്ചത്.
ഉറവിടങ്ങളെ ഉദ്ധരിച്ചു വാര്‍ത്ത നല്‍കുന്നവര്‍ സത്യം മനസിലാക്കാന്‍ ശ്രമിക്കണമെന്ന് ഇന്‍സ്റ്റഗ്രാമിലെഴുതിയ കുറിപ്പില്‍ അനുഷ്ക പറയുന്നു.
ഫോക്‌സ് സ്റ്റാര്‍ ഹിന്ദിയും ക്ലീന്‍ സ്റ്റേറ്റ് ഫിലിംസും ചേര്‍ന്നാണ് ഫില്ലൗരി നിര്‍മിക്കുന്നത്. ചാനലുകളും വെബ്‌സൈറ്റുകളും പത്രങ്ങളും എന്തെങ്കിലും അവകാശപ്പെടുന്നതിനു മുമ്പ് കാര്യങ്ങള്‍ മനസിലാക്കൂ.
ഉറവിടങ്ങളെ ഉദ്ധരിച്ച് ഇത്തരം വ്യാജ വാര്‍ത്തകള്‍ നല്‍കുന്നതിലൂടെ എന്റെയും സഹപ്രവര്‍ത്തകരുടെയും അധ്വാനം അപമാനിക്കപ്പെടുകയാണെന്ന് അനുഷ്ക കുറ്റപ്പെടുത്തി. അനുഷ്‌കയുടെയും സഹോദരന്റെയും ഉമസ്ഥതതയിലുള്ള നിര്‍മാണ കമ്പനിയാണ് ക്ലീന്‍ സ്റ്റേറ്റ് ഫിലിംസ്.
അന്‍ഷായ് ലാല്‍ സംവിധാനം നിര്‍വഹിക്കുന്ന ഫില്ലൗരി അടുത്തമാസം 24നാണ് തീയറ്ററിലെത്തുന്നത്.
