ജൊഹാനസ്ബർഗ്: ഇന്ത്യൻ ക്രിക്കറ്റ് നായകൻ വിരാട് കോഹ്ലിയുടെ റിക്കാർഡ് സ്വന്തം പേരിലാക്കി ദക്ഷിണാഫ്രിക്കൻ ബാറ്റ്സ്മാൻ ഹാഷിം അംല. ഏകദിനത്തിൽ വേഗത്തിൽ ഏഴായിരം റണ്സെന്ന റിക്കാർഡാണ് അംല കോഹ്ലിയിൽ നിന്നു അടിച്ചെടുത്തത്.
കോഹ്ലിയുടേത് 161 ഇന്നിംഗ്സുകളുടെ റിക്കാർഡായിരുന്നു. 151 ഇന്നിംഗ്സുകളിൽ നിന്നാണ് അംല 7000 റണ്സ് മറികടന്നത്. ഇംഗ്ലണ്ടിനെതിരായ പരമ്പരയിലെ മൂന്നാം ഏകദിനത്തിലായിരുന്നു അംലയുടെ നേട്ടം. പരമ്പരയിൽ ദക്ഷിണാഫ്രിക്ക 2-1ന് പരാജയപ്പെട്ടിരുന്നു. ഇപ്പോഴത്തെ നേട്ടം കൂടാതെ അതിവേഗത്തിൽ 2000, 3000, 4000, 5000, 6000 റണ്സുകളുടെ റിക്കാർഡും അംലയുടെ പേരിലാണ്.
ദക്ഷിണാഫ്രിക്കയുടെ എബി ഡിവില്ല്യേഴ്സ്(166), ഇന്ത്യയുടെ സൗരവ് ഗാംഗുലി(174) വെസ്റ്റ് ഇൻഡീസിന്റെ ബ്രയൻ ലാറ(183) എന്നിവരാണ് 7000 റണ്സ് നേട്ടത്തിൽ അംലയ്ക്കും കോഹ്ലിക്കും തൊട്ടു പിന്നിലായിട്ടുള്ളത്.