കൊച്ചി: ഫോര്ട്ട് കൊച്ചിയിലെ ഹോംസ്റ്റേയില് ഗുണ്ടാ ആക്രമണം. കഴിഞ്ഞദിവസം വൈകിട്ടോടെയാണ് ഫോര്ട്ട് കൊച്ചിയിലെ ഹോംസ്റ്റേയില് അക്രമസംഭവങ്ങള് ഉണ്ടായത് . സംഭവവുമായി ബന്ധപ്പെട്ട് രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്. പെണ്കുട്ടികളെ ശല്യംചെയ്തത് ചോദ്യം ചെയ്തതിനാണ് ഗുണ്ടാസംഘം ഹോംസ്റ്റേയിലെത്തി ആക്രമണം അഴിച്ചുവിട്ടത്. ഇതോടെ ഹോംസ്റ്റേ നടത്തിപ്പുകാരും തിരിച്ചടിക്കുകയായിരുന്നു .
സൈക്കിള് വാടകയ്ക്ക് എടുക്കാന് വേണ്ടി ഏതാനും പെണ്കുട്ടികള് ഫോർട്ട് കൊച്ചിയിലെ ഹോംസ്റ്റേയില് എത്തിയിരുന്നു. ഇതേ സമയം സമീപത്തെ ബാറില്നിന്ന് മദ്യപിച്ചിറങ്ങിയ യുവാക്കള് പെണ്കുട്ടികളെ ശല്യം ചെയ്യുകയായിരുന്നു . ഇതിനെ ഹോംസ്റ്റേ നടത്തിപ്പുകാര് ചോദ്യംചെയ്തതോടെ യുവാക്കള് മട്ടാഞ്ചേരിയില്നിന്ന് കൂടുതല്പേരെ വിളിച്ചുവരുത്തുകയും ആക്രമണം അഴിച്ചുവിടുകയുമായിരുന്നു. ഹോംസ്റ്റേയില് അതിക്രമിച്ചുകയറിയ ഗുണ്ടാസംഘം സ്ഥാപനം അടിച്ചുതകര്ത്തു. ഇതോടെ ഹോംസ്റ്റേ നടത്തിപ്പുകാരും തിരിച്ചടിച്ചെന്നാണ് വിവരം. ഇരുകൂട്ടര്ക്കുമെതിരേ സംഭവത്തില് കേസെടുക്കുമെന്നും കൂടുതല് പ്രതികളെ ഉടന് പിടികൂടുമെന്നും മട്ടാഞ്ചേരി എ.സി.പി. അറിയിച്ചു.