മുംബൈ: ഇനി നിങ്ങളുടെ ഉച്ചാരണം ശരിയാക്കാൻ ഗൂഗിൾ ഉണ്ടാകും. ഇംഗ്ലീഷിലെ കഠിന പദങ്ങളുടെ ശരിയായ ഉച്ചാരണം കൊണ്ടുവരാൻ പുത്തൻ ഫീച്ചറുമായാണ് ഗൂഗിൾ എത്തിയിരിക്കുന്നത്.
വാക്കുകളുടെ ഉച്ചാരണം തെറ്റുമ്പോൾ ശരിയായ ഉച്ചാരണം കേൾപ്പിക്കുക മാത്രമല്ല അവ എങ്ങനെയാണ് ഉച്ചരിക്കേണ്ടതെന്ന് പഠിപ്പിക്കുകയും ചെയ്യും. സേർച്ച് ബാറിലെ “പ്രാക്ടീസ്’’ മെനുവിൽ ടാപ് ചെയ്ത ശേഷമാണ് പരിശീലനം ആരംഭിക്കേണ്ടത്. ഉച്ചാരണം തേടിയ പദം ഫോണിലെ മൈക്രോഫോണിലൂടെ ഉപയോക്താവ് പറയണം. അതിനുശേഷം ഉച്ചാരണം ശരിയായില്ലെങ്കിൽ ഉച്ചാരണത്തിൽ എന്തു മാറ്റമാണ് വരുത്തേണ്ടതെന്ന നിർദേശവും ഗൂഗിൾ നൽകും. ഉച്ചാരണം ശരിയാകുംവരെ ഈ പരിശീലനം തുടരാനാവും എന്നതും ഇതിന്റെ സവിശേഷതയാണ്.
അമേരിക്കൻ ഇംഗ്ലീഷ് അടിസ്ഥാനമാക്കിയുള്ള ഉച്ചാരണ പരിശീലനമാണ് ഗൂഗിൾ ഇപ്പോൾ അവതരിപ്പിച്ചിരിക്കുന്നത്. വരും ദിവസങ്ങളിൽ മറ്റു ഭാഷാഭേദങ്ങളിലുള്ള പരിശീലനവും ആരംഭിക്കുമെന്ന് ഗൂഗിൾ അറിയിച്ചു.