ഗൂഗിളിന്റെ ഡിജിറ്റൽ പേയ്മെന്റ് ആപ്പായ ഗൂഗിൾ പേ ഒരു പുതിയ ഭാഷ അവതരിപ്പിച്ചു – ഹിംഗ്ലീഷ് . ഇതോടെ, ഗൂഗിൾ പേ ഇപ്പോൾ ഹിന്ദി, ഇംഗ്ലീഷ്, കന്നഡ, തമിഴ് എന്നിവയുൾപ്പെടെ ഒമ്പത് ഭാഷകളിൽ സേവനങ്ങൾ വാഗ്ദാനം ചെയ്യുന്നു. ഈ പ്രത്യേകത ഗൂഗിൾ പേയുടെ ഐഒഎസ് ആൻഡ്രോയ്‍ഡ് പതിപ്പിൽ ലഭ്യമാണ്
ചുരുക്കത്തിൽ, ഹിന്ദിയും ഇംഗ്ലീഷും ചേർന്നതാണ് ഹിംഗ്ലീഷ്. അതായത് ഇംഗ്ലീഷിൽ എഴുതിയ ഹിന്ദിയിലായിരിക്കും ഐക്കണുകൾ. പുതുതലമുറയെ പ്രത്യേകിച്ച് മില്ലേനിയൽസിനെ ആകർഷിക്കാനാണ് ഈ മാറ്റം എന്നാണ് ടെക് വൃത്തങ്ങൾ പറയുന്നു. അതുവഴി അതിന്റെ ഉപയോക്തൃ അടിത്തറ വർദ്ധിക്കാൻ സാധിക്കുമെന്ന് ഗൂഗിൾ ഇന്ത്യ പ്രതീക്ഷിക്കുന്നു.
ഡിജിറ്റൽ പേയ്മെന്റ് ആപ്പിൽ ഹിംഗ്ലീഷ് ഭാഷ ഉൾപ്പെടുത്തുന്നത് ഉൾപ്പെടെയുള്ള പുതിയ ഫീച്ചറുകൾ അവതരിപ്പിക്കുമെന്ന് ഗൂഗിൾ കഴിഞ്ഞ വർഷം പ്രഖ്യാപിച്ചിരുന്നു. ഗൂഗിൾ പേയിൽ ഹിംഗ്ലീഷ് ഭാഷ പ്രവർത്തനക്ഷമമാക്കാൻ, ഉപയോക്താക്കൾ ആപ്പിന്റെ സെറ്റിംഗിൽ പോയി ‘വ്യക്തിഗത വിവരങ്ങൾ’ ക്ലിക്ക് ചെയ്യണം, അതിന് താഴെയായി അവർ ഭാഷാ വിഭാഗം കണ്ടെത്തും. ഭാഷാ വിഭാഗം തുറന്ന ശേഷം, ഉപയോക്താക്കൾക്ക് ഹിംഗ്ലീഷ് ഭാഷ തിരഞ്ഞെടുക്കാം.
ഉപയോക്താക്കൾ ഹിംഗ്ലീഷ് ഭാഷ തെരഞ്ഞെടുത്താൽ, അവർ ആപ്പിൽ പേയ്മെന്റ് നിർദ്ദേശങ്ങൾ, ബട്ടണുകൾ, മറ്റ് ഉള്ളടക്കങ്ങൾ എന്നിവയുടെ വിവർത്തനങ്ങൾ ലഭിക്കും. ഉദാഹരണത്തിന്, ‘നിങ്ങളുടെ ബാങ്ക് അക്കൗണ്ട് ചേർക്കുക’ എന്നത് ‘അപ്ന ബാങ്ക് അക്കൗണ്ട് ആഡ് കരീൻ’ എന്ന് കാണിക്കും, ‘നിങ്ങളുടെ കോൺടാക്റ്റുകൾക്ക് പണമടയ്ക്കുക’ എന്നത് ‘കോൺടാക്റ്റ്സ് കോ പേ കരീൻ’ ആയി മാറും.
യുപിഐ പേയ്മെന്റ് വിഭാഗത്തിലെ മുൻനിര പേയ്മെന്റ് ആപ്പുകളിൽ ഒന്നാണ് ഗൂഗിൾ പേ. ഫോൺപേയ്‌ക്കൊപ്പം യുപിഐ സ്‌പെയ്‌സിൽ 84 ശതമാനത്തിലധികം വിപണി വിഹിതം ഇവർക്കുണ്ട്. പേടിഎം, ഭാരത് പേ, ആമസോൺ പേ, വാട്ട്സ്ആപ്പ് പേ എന്നിവയിൽ നിന്ന് ഗൂഗിൾ പേ ഇന്ത്യൻ വിപണിയിൽ കടുത്ത മത്സരമാണ് നേരിടുന്നത്.
