ന്യൂഡല്ഹി: രാജ്യത്ത് ഇന്ധനവില നാളെയും കൂട്ടും. പെട്രോള് ലിറ്ററിന് 44 പൈസയും ഡീസലിന് 42 പൈസയുമാണ് കൂട്ടുന്നത്. ഇന്നത്തെ വില വര്ധനവോടെ സംസ്ഥാനത്തെ പെട്രോള് വില 115 രൂപ കടന്നിരുന്നു. ഇന്ന് പെട്രോളിന് 87 പൈസയും ഡീസലിന് 85 പൈസയും കൂട്ടിയിരുന്നു.നീണ്ട ഇടവേളയ്ക്ക് ശേഷം രാജ്യത്ത് പെട്രോളിന്റെയും ഡീസലിന്റെയും വില കുത്തനെ ഉയരുകയാണ്. ഇന്ധന വിലയുടെ എക്സൈസ് ഡ്യൂട്ടി കുറയ്ക്കുകയും ഫെബ്രുവരി, മാര്ച്ച് മാസങ്ങളില് നടന്ന 5 സംസ്ഥാനങ്ങളിലെ നിയമസഭാ തെരഞ്ഞെടുപ്പിന്റെയും പശ്ചാത്തലത്തില് നവംബര് 4 മുതല് വില വര്ധിപ്പിക്കുന്നത് നിര്ത്തിവെച്ചിരുന്നു. ഈ കാലയളവില് ക്രൂഡ് ഓയിലിന്റെ വില ബാരലിന് 30 ഡോളറാണ് വര്ധിച്ചത്. യുപി, പഞ്ചാബ്, ഉത്തരാഖണ്ഡ്, ഗോവ, മണിപ്പൂര് എന്നീ സംസ്ഥാനങ്ങളിലെ നിയമസഭാ തെരഞ്ഞെടുപ്പിന് ശേഷം രാജ്യത്ത് ഇന്ധനവില വര്ധനവ് പതിവാകുകയാണ്. തുടര്ച്ചയായ 14ാം ദിവസമാണ് രാജ്യത്ത് ഇന്ധന വില വര്ധിപ്പിക്കുന്നത്.