പാരിസ്: പാരിസിൽ സ്വകാര്യ ആശുപത്രിക്ക് പുറത്തു നടന്ന വെടിവെപ്പിൽ ഒരാൾ കൊല്ലപ്പെട്ടു. മറ്റൊരാൾക്ക് പരിക്കേറ്റു. ഹെൻറി ഡുനന്റ് ആശുപത്രിക്ക് പുറത്താണ് സംഭവം. അക്രമി ഇരുചക്ര വാഹനത്തിൽ രക്ഷപെട്ടതായി ദൃക്സാക്ഷി പറഞ്ഞു. ആക്രണത്തിനു പ്രേരിപ്പിച്ചതെന്താണെന്ന് വ്യക്തമായിട്ടില്ല.
സംഭവത്തിൽ അന്വേഷണം ആരംഭിച്ചതായി അധികൃതരെ ഉദ്ധരിച്ച് അന്താരാഷ്ട്ര മാധ്യമങ്ങള്‍ റിപ്പോർട്ട്
ചെയ്തു. ക്രിമിനൽ ഇൻവെസ്റ്റിഗേഷൻ യൂണിറ്റിന്റെ നേതൃത്വത്തിലായിരിക്കും അന്വേഷണം നടക്കുകയെന്ന് അധികൃതർ വ്യക്തമാക്കി.
പുരുഷനാണ് കൊല്ലപ്പെട്ടതെന്നും ആളെ തിരിച്ചറിഞ്ഞിട്ടില്ലെന്നും പോലീസ് വ്യക്തമാക്കി. സെക്യൂരിറ്റി ഉദ്യോഗസ്ഥയാണ് പരിക്കേറ്റ രണ്ടാത്തെ ആൾ. ഇവർക്ക് ഗുരുതരമായി പരിക്കേറ്റിട്ടുണ്ട്. റെഡ്ക്രോസ് നടത്തുന്ന ആശുപത്രിയാണ് ഹെൻറി ഡുനന്റ്. നിലവിൽ കൊവിഡ്-19 വാക്സിനേഷൻ കേന്ദ്രമായാണ് ഇത് പ്രവർത്തിക്കുന്നത്. കേന്ദ്രം തുടർന്നും പ്രവർത്തിക്കുമെന്ന് അധികൃതർ പറഞ്ഞു.
