തിരുവനന്തപുരം: ഇത്തവണത്തെ സംസ്ഥാന ബജറ്റിൽ നികുതി വർദ്ധനവ് ഉണ്ടാകില്ലെന്ന് ധനമന്ത്രി തോമസ് ഐസക്ക്. ജനപ്രിയ പ്രഖ്യാപനങ്ങളിലല്ല മറിച്ച് സുസ്ഥിര വികസനത്തിനാകും ഊന്നലെന്ന് ബജറ്റ് തയ്യാറാക്കുന്നതിനിടെ തോമസ് ഐസക്ക്. കൊവിഡ് കാലത്ത് സാമ്പത്തികമായി നട്ടെല്ലൊടിഞ്ഞ സംസ്ഥാനത്തെ ഒന്ന് നിവർത്തി നിർത്തുക തന്നെ പ്രധാന വെല്ലുവിളിയാണ്. തൊഴിലില്ലായ്മ പരിഹരിക്കാനുള്ള വഴികൾക്കാണ് 2021 ൽ ഊന്നൽ നൽകുക.
മൂന്ന് മാസത്തേക്കുള്ള വോട്ട് ഓണ്‍ അക്കൗണ്ട് എന്നതിനപ്പുറം തുടർഭരണത്തിൽ വിശ്വസിച്ച് തന്നെയാണ് സാമ്പത്തികാസൂത്രണം. കൊവിഡ് പ്രതിസന്ധിയിലെ കൈത്താങ്ങ് തുടരും എന്നാൽ ഭരണമൊഴിയും മുമ്പ് വോട്ടർമാരെ പ്രീണിപ്പിക്കാനുള്ള പതിവ് കുറുക്കുവഴികളിലേക്ക് സർക്കാർ ഇല്ലെന്നും ധനമന്ത്രി പറഞ്ഞു.
