കോഴിക്കോട്: കുന്ദമംഗലത്ത് പന്ത്രണ്ടുകാരിയായ മകളെ പീഡിപ്പിക്കാന് ശ്രമിച്ച പിതാവ് വിദേശത്തേക്ക് കടന്നു. പൊലീസ് കേസെടുത്ത് അന്വേഷണം ആരംഭിച്ചു. പൊലീസ് ഇക്കാര്യത്തില് ഒത്തുകളിക്കുകയാണോ എന്നു പെണ്കുട്ടിയും കുടുംബവും സംശയിക്കുന്നു. എന്നാല് പ്രതിയെ തിരിച്ചെത്തിക്കാനുള്ള നടപടികള് തുടങ്ങിയതായി പൊലീസ് അറിയിച്ചു.
അശ്ലീല വീഡിയോ കാണിച്ച് മകളെ പിതാവ് പീഡിപ്പിക്കാന് ശ്രമിച്ചുവെന്നാണ് പരാതി. പലതവണ സ്വകാര്യ ഭാഗങ്ങളില് കടന്നുപിടിച്ചു. പുറത്തുപറഞ്ഞാല് ഉമ്മയെയും ഇളയ സഹോദരിയെയും കൊല്ലുമെന്ന് ഭീഷണിപ്പെടുത്തി. അതിനാല് വിവരം പുറത്തറിഞ്ഞില്ല. ഒടുവില് പഠനത്തില് പിന്നാക്കം പോയപ്പോഴാണ് കുട്ടിയെ അധ്യാപകര് ശ്രദ്ധിച്ചതും വിവരം പുറത്തായതും.
പൊലീസ് കേസെടുത്ത് അന്വേഷണം തുടങ്ങിയപ്പോഴേക്കും പ്രതി വിദേശത്തേക്കു കടന്നിരുന്നു. ഇക്കാര്യം പലതവണ ശ്രദ്ധയില്പെടുത്തിയിട്ടും കുന്ദമംഗലം പൊലീസ് മുഖവിലയ്ക്കെടുത്തില്ലെന്നും ആക്ഷേപമുണ്ട്. എന്നാല് അന്വേഷണം പുരോഗമിക്കുകയാണെന്നും വീസ റദ്ദാക്കി പ്രതിയെ തിരിച്ചെത്തിക്കാനാണു ശ്രമിക്കുന്നതെന്നും പൊലീസ് പറയുന്നു.