ആലപ്പുഴ: കുട്ടനാട്ടിലെ കര്ഷക ആത്മഹത്യയുടെ പ്രാഥമിക പോസ്റ്റുമോര്ട്ടം റിപ്പോര്ട്ട് പുറത്ത് വന്നു. വിഷം ഉള്ളില് ചെന്നതാണ് മരണ കാരണമെന്ന് സ്ഥിരീകരിച്ചു. വിഷം ഏതെന്ന് അറിയാന് സാമ്പിളുകള് രാസ പരിശോധനയ്ക്ക് അയച്ചിട്ടുണ്ട്. ആത്മഹത്യ കുറുപ്പിലെ കൈയക്ഷരം പ്രസാദിന്റേത് തന്നെയാണെന്നാണ് പൊലീസ് നിഗമനം. അമ്പലപ്പുഴ പോലീസ് ആണ് കേസ് അന്വേഷിക്കുന്നത്.
ഇന്നലെയാണ് തകഴി കുന്നുമ്മ അംബേദ്കര് കോളനിയില് താമസിക്കുന്ന കര്ഷകന് കെ.ജി പ്രസാദിനെ വിഷം കഴിച്ച് മരിച്ച നിലയില് കണ്ടെത്തുന്നത്. ബിജെപി കര്ഷക സംഘടനയുടെ ഭാരവാഹി കൂടിയാണ് പ്രസാദ്. സര്ക്കാരിനെതിരെ ഗുരുതര ആരോപണങ്ങള് ഉന്നയിക്കുന്ന കുറിപ്പ് എഴുതിവച്ച ശേഷമായിരുന്നു കര്ഷകന്റെ ആത്മഹത്യ. പിആര്എസ് വായ്പാ തിരിച്ചടവ് വൈകിയതിനെ തുടര്ന്ന് സിബില് സ്കോര് കുറഞ്ഞതാണ് പ്രസാദിന് ബാങ്കുകളില് നിന്ന് മറ്റ് വായ്പകള് നിഷേധിക്കപ്പെട്ടതിന് കാരണമായത്. സര്ക്കാരാണ് തന്റെ മരണത്തിന് ഉത്തരവാദിയെന്ന് കത്തിലും, ഫോണ് കാളിലും പ്രസാദ് സൂചിപ്പിക്കുന്നുണ്ട്.
വായ്പാ തിരിച്ചടവ് വൈകിയതോടെ പ്രസാദിന് മറ്റ് വായ്പകള് കിട്ടാതെ വന്നത് കര്ഷകനെ വലിയ സാമ്പത്തിക ഞെരുക്കത്തിലേക്ക് തള്ളിവിട്ടെന്നും ഇതില് മനംനൊന്താണ് ഇദ്ദേഹം ആത്മഹത്യ ചെയ്തതെന്നുമാണ് വിവരം. താന് അധ്വാനിച്ചുണ്ടാക്കിയ നെല്ല് കൊടുത്തതിന്റെ വിലയാണ് പിആര്എസ് ലോണെടുത്തത് ആയതെന്ന് കര്ഷകന്റെ കുറിപ്പില് പറയുന്നു. ഇത് പലിശസഹിതം കൊടുത്തുതീര്ക്കേണ്ട ബാധ്യത സര്ക്കാരിനാണെന്നും തന്റെ മരണത്തിന് തൊട്ടുമുന്പ് കര്ഷകന് എഴുതിവച്ചിരുന്നു.