കോട്ടയം: കോട്ടയത്ത് ഒരു കുടുംബത്തിലെ മൂന്ന് പേരെ ആത്മഹത്യ ചെയ്ത നിലയില് കണ്ടെത്തി. മകള് പീഡിപ്പിക്കപ്പെട്ടതറിഞ്ഞ മനോവിഷമത്തില് ആദ്യം അച്ഛനും അമ്മയും ജീവനൊടുക്കുകയായിരുന്നു. ഇരുവരേയും മരിച്ചനിലയില് കണ്ടെത്തിയതിനെത്തുടര്ന്ന് മകളും ആത്മഹത്യ ചെയ്തു.
ശാരീരിക അസ്വാസ്ഥ്യത്തെത്തുടര്ന്ന് കഴിഞ്ഞ ദിവസം മൂവാറ്റുപുഴയിലെ ആശുപത്രിയില് ചികിത്സ തേടിയ പെണ്കുട്ടി രണ്ടുമാസം ഗര്ഭിണിയാണെന്ന് കണ്ടെത്തി.
കുട്ടിയ്ക്ക് പ്രായപൂര്ത്തിയാകാത്തതിനാല് ആശുപത്രി അധികൃതര് വിവരം പോലീസില് അറിയിക്കുകയായിരുന്നു.
തുടര്ന്ന് പെണ്കുട്ടിയുടെ മൊഴി എടുത്തശേഷം പ്രതിയായ യുവാവിനെ പൊലീസ് അറസ്റ്റുചെയ്തതിരുന്നു. ഇറുമ്പയം കല്ലുവേലി ജിഷ്ണു (20) ആണ് അറസ്റ്റിലായത്. ഞായറാഴ്ച ഇയാളെ കോടതിയില് ഹാജരാക്കി റിമാന്ഡ് ചെയ്തു. പോക്സോ നിയമപ്രകാരമാണ് നടപടി.
മകള് പീഡിപ്പിക്കപ്പെട്ട വാര്ത്തയറിഞ്ഞ അച്ഛനംു അമ്മയും വിഷമത്തിലായിരുന്നു. ഞായറാഴ്ച രാവിലെ ഏഴുമണിയോടെ മകള് ഉണര്ന്നുവന്നപ്പോള് അച്ഛനും അമ്മയും മുറിയുടെ ജനലില് ഷാളില് തൂങ്ങിമരിച്ചുകിടക്കുന്നതാണ് കണ്ടത്. പെണ്കുട്ടി, ദൂരസ്ഥലത്ത് താമസിക്കുന്ന സഹോദരിയെ വിളിച്ച് വിവരം പറഞ്ഞു.അവര് അറിയിച്ചത് പ്രകാരം പോലീസും സമീപവാസികളും വീട്ടിലെത്തിയപ്പോള് മകളും തൂങ്ങിമരിച്ച നിലയിലായിരുന്നു.