ബംഗളൂരു: തിരഞ്ഞെടുപ്പിന് ദിവസങ്ങള് മാത്രം ശേഷിക്കെ നഗരത്തിലെ കെട്ടിടത്തിനുള്ളില് നിന്ന് പതിനായിരത്തോളം വ്യാജ തിരിച്ചറിയല് കാര്ഡുകള് കണ്ടെത്തി. സംഭവത്തില് തിരഞ്ഞെടുപ്പ് കമ്മീഷന് അന്വേഷണത്തിന് ഉത്തരവിട്ടു. ഇതിനു പിന്നില് കോണ്ഗ്രസ് എംഎല്എയാണെന്നും രാജ രാജേശ്വരി മണ്ഡലത്തിലെ തിരഞ്ഞെടുപ്പ് റദ്ദാക്കണമെന്നും ആവശ്യപ്പെട്ട് ബിജെപി രംഗത്തു വന്നതിനു പിന്നാലെയാണ് തിരഞ്ഞെടുപ്പ് കമ്മീഷന് അന്വേഷണത്തിന് ഉത്തരവിട്ടത്.
തിരഞ്ഞെടുപ്പ് അട്ടിമറിക്കാനുള്ള കോണ്ഗ്രസ് ശ്രമത്തിന്റെ ഫലമായാണ് വ്യാജ തിരിച്ചറിയല് കാര്ഡ് മണ്ഡലത്തില് നിന്ന് കണ്ടെടുത്തതെന്ന് കേന്ദ്രമന്ത്രി പ്രകാശ് ജാവദേക്കര് ആരോപിച്ചു.
തിരിച്ചറിയല് കാര്ഡുകള്ക്കു പുറമെ അഞ്ച് ലാപ്ടോപ്പുകളും ഒരു പ്രിന്ററും ഇവിടെ നിന്ന് കണ്ടെടുത്തതായി റിപ്പോര്ട്ടുകളുണ്ട്. എന്നാല് ബിജെപിയുടെ ആരോപണങ്ങള് നിഷേധിച്ച് കോണ്ഗ്രസ് രംഗത്തെത്തി. ഇത് ബിജെപിയുടെ നാടകമാണെന്നും തിരിച്ചറിയല് കാര്ഡുകള് കണ്ടെത്തിയ കെട്ടിടം ബി.ജെ.പി എംഎല്എയുടെ ഉടമസ്ഥതയിലുള്ളതാണെന്നും കോണ്ഗ്രസ് ആരോപിച്ചു.