കൊൽക്കത്ത : പശ്ചിമബംഗാൾ മുൻമുഖ്യമന്ത്രിയും സിപിഎം നേതാവുമായ ബുദ്ധദേവ് ഭട്ടാചാര്യ ആശുപത്രിയിൽ. ശ്വാസതടസ്സത്തെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. അദ്ദേഹത്തിന്റെ നില ഗുരുതരമാണെന്ന് ദേശീയമാധ്യമങ്ങൾ റിപ്പോർട്ട് ചെയ്തു. ശ്വാസതടസ്സം നേരിട്ടതിനെ തുടർന്നാണ് അദ്ദേഹത്തെ ആശുപത്രിയിലേക്ക് മാറ്റിയത്. കോവിഡ് പരിശോധനാ ഫലം നെഗറ്റീവാണെന്നും ചികിത്സയോട് പ്രതികരിക്കുന്നുണ്ടെന്നും ആശുപത്രി അധികൃതർ അറിയിച്ചു.
76കാരനായ ഭട്ടാചാര്യയെ പ്രവേശിപ്പിച്ചിരിക്കുന്നത് കൊൽക്കത്തയിലെ വുഡ്ലാന്റ് ആശുപത്രിയിലാണ്. വെന്റിലേറ്ററിന്റെ സഹായത്തോടെയാണ് അദ്ദേഹം ഇപ്പോൾ ശ്വസിക്കുന്നത്. ബുദ്ധദേവ് ഭട്ടാചാര്യയുടെ ആരോഗ്യ സ്ഥിതിയിൽ ആശങ്ക പ്രകടിപ്പിച്ച മുഖ്യമന്ത്രി മമതാ ബാനർജി, ആശുപത്രിയിലെത്തുകയും കുടുംബത്തിന് എല്ലാ സഹായങ്ങളും വാഗ്ദാനം ചെയ്യുകയും ചെയ്തു. ഗവർണർ ജഗ്ദീപ് ധങ്കറും ആശുപത്രിയിലെത്തി മുൻമുഖ്യമന്ത്രിയുടെ ആരോഗ്യനില അന്വേഷിച്ചറിഞ്ഞു.
