യൂറോ കപ്പ്; സെമിപോരാട്ടത്തിന് നാളെ തുടക്കം

ലണ്ടന്‍: യൂറോ കപ്പില്‍ സെമിപോരാട്ടത്തിന് നാളെ തുടക്കം. ആദ്യ സെമിയില്‍ ഇറ്റലിക്ക് സ്പെയിനാണ് എതിരാളി. രാത്രി 12.30നാണ് മത്സരം. ഇംഗ്ലണ്ട്- ഡെന്‍മാര്‍ക്ക് സെമി മറ്റന്നാള്‍ നടക്കും.

ജൈത്രയാത്ര തുടരുന്ന ഇറ്റലിയും സ്പെയിനും നേര്‍ക്കുനേര്‍ വരുമ്പോള്‍ മത്സരം തീപാറുമെന്നുറപ്പ്. കഴിഞ്ഞ നാല് യൂറോയില്‍ രണ്ട് തവണ ചാംപ്യന്മാരായ സ്പെയിന്‍ ഒരിക്കല്‍ കൂടി കലാശപ്പോരാട്ടം സ്വപ്നം കാണുന്നു. 32 കളികളില്‍ തോല്‍വിയറിയാതെ മുന്നേറുന്ന ഇറ്റലിയുടെ ആക്രമണം സ്പെയിനിന് മുന്നില്‍ ഫലിക്കുമോയെന്ന് കണ്ടറിയണം.

സ്വിറ്റ്സര്‍ലന്‍ഡിനെ പെനാല്‍റ്റി ഷൂട്ടൗട്ടില്‍ തകര്‍ത്താണ് സ്പെയിനെത്തുന്നത്. ഇറ്റലി ക്വാര്‍ട്ടറില്‍ മറികടന്നത് ബെല്‍ജിയത്തെ. കരുത്തരായ ഇംഗ്ലണ്ടിന് മറ്റന്നാള്‍ ഡെന്‍മാര്‍ക്കാണ് രണ്ടാം സെമിയില്‍ എതിരാളികള്‍.

ഇതുവരെ യൂറോ കിരീടത്തില്‍ തൊടാത്ത ഇംഗ്ലണ്ട് 25 വര്‍ഷത്തിന് ശേഷമാണ് അവസാന നാലിലെത്തുന്നത്. ഡെന്‍മാര്‍ക്ക് രണ്ടാം കിരീടത്തിനായാണ് ഒരുങ്ങുന്നത്. 1992ലായിരുന്നു അവരുടെ ആദ്യ കിരീടം,. വെംബ്ലിയിലാണ് രണ്ട് സെമിഫൈനലും നടക്കുക.

Top