ന്യൂഡല്‍ഹി : ഹരിയാനയിലെയും മഹാരാഷ്ട്രയിലെയും ബിജെപി സര്‍ക്കാര്‍ അഞ്ചുവര്‍ഷം ജനങ്ങള്‍ക്ക് വേണ്ടി പ്രവര്‍ത്തിച്ചതിന്റെ പ്രതിഫലനമാണ് ഈ തെരഞ്ഞെടുപ്പ് വിജയമെന്ന് പ്രധാനമന്ത്രി നരേന്ദ്രമോദി. ജനങ്ങള്‍ ബിജെപിയില്‍ അര്‍പ്പിച്ച വിശ്വാസത്തിന് നന്ദി പറയുന്നതായും അദ്ദേഹം അറിയിച്ചു.
മഹാരാഷ്ട്രയില്‍ അരനൂറ്റാണ്ടിനിടെ ഒരു മുഖ്യമന്ത്രിയും അഞ്ചുവര്‍ഷം പൂര്‍ത്തീകരിച്ചിരുന്നില്ല. ഒരു സര്‍ക്കാര്‍ അഞ്ചുവര്‍ഷം പൂര്‍ത്തിയാക്കി ഭരണത്തുടര്‍ച്ച കിട്ടുക എന്നത് അത്ര എളുപ്പമല്ലെന്നും മോദി പറഞ്ഞു. ഈ സാഹചര്യത്തില്‍ ബിജെപിയെ വലിയ കക്ഷിയായി തെരഞ്ഞെടുത്തത് വലിയ കാര്യം തന്നെയാണ്. ഹരിയാനയില്‍ വോട്ടുവിഹിതം കൂട്ടാനായത് നേട്ടമാണ്. 2014 വരെ പ്രാദേശിക പാര്‍ട്ടികള്‍ തരുന്ന സീറ്റുകളില്‍ മല്‍സരിക്കുകയായിരുന്നു ബിജെപിയുടെ പതിവ്. ഇപ്പോള്‍ ആ സ്ഥിതി മാറിയെന്നും മോദി വ്യക്തമാക്കി.
മഹാരാഷ്ട്രയില്‍ 288ല്‍ 159 സീറ്റുകളാണ് എന്‍ഡിഎ സഖ്യത്തിന് കിട്ടിയത്. ഇവിടെ കോണ്‍ഗ്രസ് എന്‍സിപി സഖ്യം 102 സീറ്റുകള്‍ നേടി. ഹരിയാനയിലാവട്ടെ 90ല്‍ 40 സീറ്റുകളാണ് ബിജെപി നേടിയത്. ഇവിടെ കോണ്‍ഗ്രസിന് 31 സീറ്റുകള്‍ നേടാന്‍ കഴിഞ്ഞു.
