കൊച്ചി: കരുവന്നൂര് ബാങ്ക് കള്ളപ്പണ കേസില് തൃശൂര് സിപിഎം ജില്ലാ സെക്രട്ടറി എം എം വര്ഗീസിന് വീണ്ടും ഇ ഡി നോട്ടീസ്. ഈ മാസം 19 ന് ഹാജരാകണമെന്നാണ് നിര്ദ്ദേശം. മൂന്നാം തവണയാണ് വര്ഗീസിന് നോട്ടീസ് അയച്ചത്. കഴിഞ്ഞ ചൊവ്വാഴ്ച ഹാജരാകാന് സമന്സ് നല്കിയിരുന്നെങ്കിലും ഹാജരായിരുന്നില്ല.
കരുവന്നൂര് ബാങ്കിലെ സി പി എം അക്കൗണ്ടുകളുമായി ബന്ധപ്പെട്ടാണ് പാര്ട്ടി തൃശൂര് ജില്ലാ സെക്രട്ടറി എം എം വര്ഗീസിനെ ഇ ഡി ചോദ്യം ചെയ്യുന്നത്. സിപിഎമ്മിന് കരുവന്നൂര് ബാങ്കില് കൂടുതല് അക്കൗണ്ടുകള് ഉണ്ടെന്നാണ് ഇ ഡി ആരോപിക്കുന്നത്. 5 അക്കൗണ്ടുകള് ഇതുവരെ കണ്ടെത്തിയിട്ടുണ്ട്. ഒരോ അക്കൗണ്ട് വഴിയും അരക്കോടിയുടെ വരെ ഇടപാടുകള് നടന്നിട്ടുണ്ടെന്നും ഇഡി പറയുന്നു.
കരുവന്നൂര് നിക്ഷേപത്തട്ടിപ്പില് സിപിഎമ്മിനും കമ്മീഷന് ലഭിച്ചെന്നാണ് എന്ഫോഴ്സ്മെന്റ് ഡയറക്ട്രേറ്റ് പറയുന്നത്. പാര്ട്ടി അക്കൗണ്ടുകള് വഴി നടന്നത് ബെനാമി ലോണുകളുടെ കമ്മിഷന് തുകയുടെ കൈമാറ്റമാണ്. ബാങ്ക് ക്രമക്കേട് പുറത്തായത്തിന് പിന്നാലെ പാര്ട്ടി അക്കൗണ്ടില് നിന്ന് 90 ശതമാനം തുകയും പിന്വലിച്ചുവെന്നും ഇഡി പറയുന്നു. എന്നാല് അക്കൗണ്ടിലെ പണമിടപാട് വിവരങ്ങള് കൈമാറാന് സിപിഎം തയ്യാറായില്ല. നേരത്തെ ചോദ്യംചെയ്യലിനിടെ അക്കൗണ്ടിലെ പണത്തിന്റെ വിവരം കൈമാറാതെ ഒഴിഞ്ഞുമാറിയ ജില്ലാ സെക്രട്ടറി എം.എം. വര്ഗീസ്, അക്കൗണ്ടുമായി ബന്ധപ്പെട്ട വിവരങ്ങള് സംസ്ഥാന സെക്രട്ടറിയോട് ചോദിക്കണമെന്നാണ് മൊഴി നല്കിയത്.
