മസ്കറ്റ് : ഒമാനിൽ പൊലീസ് നടത്തിയ മയക്കുമരുന്ന് വേട്ടയിൽ രണ്ട് വിദേശികൾ അറസ്റ്റിലായി. ലഹരിമരുന്ന് കള്ളക്കടത്ത് നടത്തിയതിനും വന്‍ തോതില്‍ ലഹരി പദാര്‍ത്ഥങ്ങള്‍ കൈവശം സൂക്ഷിച്ചതിനുമാണ് റോയല്‍ പൊലീസ് ഇവരെ അറസ്റ്റ് ചെയ്തത്.
മസ്കറ്റ് ഗവര്‍ണറേറ്റില്‍ നിന്നും ഏഷ്യന്‍ രാജ്യക്കാരായ രണ്ടു പേരെ അറസ്റ്റ് ചെയ്തതായി പൊലീസ് അറിയിച്ചു. ഇവരുടെ പക്കല്‍ നിന്നും അഞ്ച് കെട്ടുകളിലായുള്ള ക്രിസ്റ്റല്‍ ഡ്രഗുകള്‍, 284 മോര്‍ഫിന്‍ ഗുളികകള്‍, 629 മയക്കുഗുളികകള്‍, രണ്ട് കഷണം ഹാഷിഷ് എന്നിവയും മയക്കുമരുന്ന് കള്ളക്കടത്ത് നടത്തുന്നതിനുള്ള ഉപകരണങ്ങളും പൊലീസ് പിടിച്ചെടുത്തു. അറസ്റ്റിലായവര്‍ക്കെതിരെയുള്ള നിയമനടപടികള്‍ പൂര്‍ത്തിയാക്കി.
