കൊച്ചി: ബംഗളൂരു മയക്കുമരുന്ന് കേസുമായി ബന്ധപ്പെട്ട് ബിനീഷ് കോടിയേരി എന്ഫോഴ്സ്മെന്റ് ഡയറക്ടറേറ്റിന്റെ(ഇഡി) ഓഫീസില് ഹാജരായി. കൊച്ചിയിലെ ഓഫീസിലാണ് ബിനീഷ് എത്തിയത്. ഹാജരാകാന് ആറ് ദിവസത്തെ സാവകാശം ബിനീഷ് ആവശ്യപ്പെട്ടിരുന്നുവെങ്കിലും ആവശ്യം ഇഡി നിരസിച്ചു.
ഹവാല, ബിനാമി ഇടപാടുകളുമായി ബന്ധപ്പെട്ടായിരിക്കും ചോദ്യം ചെയ്യല് നടക്കുകയെന്നാണ് വിവരം. ബിനീഷുമായി ബന്ധപ്പെട്ട സ്ഥാപനങ്ങള് കേന്ദ്രീകരിച്ചാണ് അന്വേഷണം.
തിരുവനന്തപുരത്തെ യുഎഎഫ് എക്സ് സൊല്യൂഷന് പ്രൈവറ്റ് ലിമിറ്റഡ് സ്ഥാപനത്തില് നിന്ന് തനിക്ക് കമ്മീഷന് ലഭിച്ചുവെന്ന് സ്വപ്ന സുരേഷ് പറഞ്ഞിരുന്നു. സ്ഥാപനത്തിലെ ഡയറക്ടര്മാരിലൊരാളായിട്ടുള്ള അബ്ദുള് ലത്തീഫും ബിനീഷ് കോടിയേരിയും തമ്മില് അടുത്ത ബന്ധമുണ്ട് എന്ന വിവരങ്ങള് ഇഡിക്ക് ലഭിച്ചിട്ടുണ്ട്. സാമ്പത്തിക ഇടപെടലുകള് നടത്തിയെന്ന വിവരവുമുണ്ട്. ഇതടക്കമുള്ള കാര്യങ്ങളുമായി ബന്ധപ്പെട്ടാണ് ചോദ്യം ചെയ്യുന്നത്.
2015 നുശേഷം രജിസ്റ്റര് ചെയ്ത രണ്ട് കമ്പനികളില് ബിനീഷിന് പങ്കാളിത്തമുണ്ടെന്ന് വ്യക്തമായിരുന്നു. എന്നാല്, കമ്പനികള് ഇപ്പോള് പ്രവര്ത്തന രഹിതമാണ്. അനധികൃത ഇടപാടുകള് നടത്തുന്നതിനു വേണ്ടിയാണോ ഇവ രൂപവത്കരിച്ചത് എന്ന കാര്യം എന്ഫോഴ്സ്മെന്റ് അന്വേഷിക്കുന്നുണ്ട്. കമ്പനികളുടെ വരവ് ചിലവ് കണക്കുകള് സമര്പ്പിച്ചിട്ടില്ല. അവയുടെ ലൈസന്സും മറ്റും റദ്ദായിരുന്നു.