തായ്വാൻ വിഷയത്തിൽ അമേരിക്കൻ പ്രസിഡന്റ് ജോ ബൈഡന് ജാഗ്രത നിർദേശം നൽകി ചൈനീസ് പ്രസിഡന്റ്. തീകൊണ്ട് കളിക്കരുത്, അങ്ങനെ കളിച്ചാല് അതില് തന്നെ എരിഞ്ഞുപോകും യുഎസ് പ്രസിഡന്റ് ജോ ബൈഡന് മുന്നറിയിപ്പ് നൽകിയ ചൈനീസ് പ്രസിഡന്റ് ഷി ജിൻപിംഗ്. ഇരു നേതാക്കളും നടത്തിയ ടെലിഫോണ് ചര്ച്ചയിലാണ് ചൈനീസ് നേതാവ് ഇത് പറഞ്ഞത് എന്നാണ് റിപ്പോര്ട്ട്. തായ്വാന് വിഷയത്തില് പ്രതികരിക്കും മുന്പ് ചരിത്രപരമായ കാര്യങ്ങള് പരിശോധിക്കണമെന്ന് ജോ ബൈഡനോട് ഷി ജിൻപിംഗ് എടുത്തുപറഞ്ഞു.
‘തായ്വാൻ കടലിടുക്കിന്റെ ഇരുവശങ്ങളും ഒരേ ചൈനയുടെ ഭാഗമാണെങ്കിലും, അതിന്റെ നിലവിലെ അവസ്ഥ എന്താണെന്ന് മനസിലാക്കണം’ എന്ന് ഷി ബൈഡനോട് സൂചിപ്പിച്ചതായാണ് വിവരം. ‘തായ്വാൻ സ്വാതന്ത്ര്യസേന’ എന്ന പേരില് ഒരു അന്താരാഷ്ട്ര ഇടപെടലിനും ഇവിടെ സാധ്യതയില്ലെന്ന് ചൈനീസ് പ്രസിഡന്റ് വ്യക്തമാക്കി. ഇത്തരം നീക്കങ്ങളെ ചൈന ശക്തമായി എതിർക്കുമെന്നും ഷി പറഞ്ഞു.
തായ്വാൻ കടലിടുക്കിൽ ഉടനീളമുള്ള സമാധാനവും സ്ഥിരതയും തകർക്കുന്നതിനോ നിലവിലെ സ്ഥിതി മാറ്റുന്നതിനോ ഉള്ള ഏകപക്ഷീയമായ ശ്രമങ്ങള് അമേരിക്ക ശക്തമായി എതിർക്കുന്നുവെന്ന് പ്രസിഡന്റ് ബൈഡൻ ചൈനീസ് പ്രസിഡന്റിനെ അറിയിച്ചുവെന്നാണ് വൈറ്റ് ഹൗസ് പറയുന്നത്.