തിരുവനന്തപുരം: മാസ്‌ക് ധരിക്കാത്തത് ചോദ്യം ചെയ്തതിന് ഡോക്ടര്‍ക്ക് മര്‍ദ്ദനം. പാറശ്ശാല താലൂക്ക് ആശുപത്രിയിലെ ഡോക്ടര്‍ക്കാണ് മര്‍ദ്ദനമേറ്റത്. സംഭവവുമായി ബന്ധപ്പെട്ട് നാല് പേരെ പൊലീസ് കസ്റ്റഡിയിലെടുത്തു. ഇന്നലെ രാത്രി 12 മണിയോടെയാണ് സംഭവം. കൈയില്‍ മുറിവുമായി പാറശ്ശാല സ്വദേശി രാഹുല്‍ എന്ന യുവാവ് രാത്രി കാഷ്വാലിറ്റിയില്‍ എത്തിയിരുന്നു.
കൂടെ വന്നവര്‍ മാസ്‌ക് ധരിച്ചിരുന്നില്ല. മാസ്‌ക് ധരിക്കാന്‍ സെക്യൂരിറ്റി പറഞ്ഞതില്‍ പ്രകോപിതരായി ഇവര്‍ ബഹളം വയ്ക്കുകയായിരുന്നു. സംഭവമറിഞ്ഞ് സ്ഥലത്തെത്തിയ ഡ്യൂട്ടി ഡോക്ടര്‍ സനൂജിനാണ് മര്‍ദ്ദനമേറ്റത്. ഡോക്ടര്‍ നിലവില്‍ ചികിത്സയിലാണ്. ഡോക്ടറെ ആക്രമിച്ച സംഭവത്തില്‍ പ്രതിഷേധിച്ച് ജീവനക്കാര്‍ രംഗത്തെത്തി.
ഡ്യൂട്ടി ബഹിഷ്‌ക്കരണം ഉള്‍പ്പെടെയുള്ള നടപടിയിലേക്ക് മുതിര്‍ന്നു. തുടര്‍ന്ന് പാറശ്ശാല പൊലീസ് നാലു പേരെ കസ്റ്റഡിയിലെടുത്തു. പാറശ്ശാല, പ്ലാമൂട്ടുകട സ്വദേശികളായ രാഹുല്‍, സജിന്‍, ശംഭു, വിജയ് എന്നിവരെയാണ് കസ്റ്റഡിയിലെടുത്തത്. സംഭവത്തില്‍ രണ്ട് പ്രതികള്‍ കൂടി ഉണ്ടെന്ന് പൊലീസ് പറഞ്ഞു.
