ന്യൂഡല്‍ഹി: രാജ്യത്ത് കൊവിഡ് വാക്സിന് വിതരണം ജനുവരി 16 മുതല്‍ ആരംഭിക്കും. ആദ്യ ഘട്ടത്തില്‍ 30 കോടി ആളുകള്‍ക്കാണ് വാക്സിന് നല്‍കുക.
കൊവിഡ് മുന്‍നിര പോരാളികള്‍ക്ക് ആദ്യഘട്ടത്തില്‍ വാക്സിന് നല്‍കും. മൂന്നു കോടി ആരോഗ്യപ്രവര്‍ത്തകരെയാണ് ആദ്യഘട്ടത്തില്‍ ഉള്‍പ്പെടുത്തിയിരിക്കുന്നത്.
തുടര്‍ന്ന് അമ്പതു വയസ്സിനു മുകളില്‍ പ്രായമുള്ളവരും അമ്പതു വയസ്സിനു താഴെ പ്രായമുള്ള അസുഖബാധിതരും ഉള്‍പ്പെടുന്ന 27 കോടിയോളം ആളുകള്‍ക്കും വാക്സിന് നല്‍കുമെന്ന് കേന്ദ്ര സര്‍ക്കാര്‍ അറിയിച്ചു. രാജ്യത്തെ കോവിഡ് സാഹചര്യവും വാക്സിന് വിതരണവുമായി ബന്ധപ്പെട്ട തയ്യാറെടുപ്പുകളും വിലയിരുത്താന്‍ പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ഇന്ന് ഉന്നതതലയോഗം ചേര്‍ന്നിരുന്നു. ഈ യോഗത്തിലാണ് വാക്സിന് വിതരണവുമായി ബന്ധപ്പെട്ട തീരുമാനം എടുത്തത്.
