ദോഹ: ഖത്തര്‍ കൊവിഡ് വാക്‌സിനേഷന്‍ ക്യാംപയിന്‍ സുപ്രധാനമായ ഒരു നാഴികക്കല്ല് കൂടി പിന്നിട്ടതായി ആരോഗ്യ മന്ത്രാലയം അറിയിച്ചു. 40 ലക്ഷം വാക്സിന് ഡോസുകള്‍ എന്ന ലക്ഷ്യം ഇതിനകം പൂര്‍ത്തിയാക്കിയതായി അധികൃതര്‍ വ്യക്തമാക്കി.
രാജ്യത്ത് വാക്‌സിനേഷന്‍ ആരംഭിച്ചതു മുതല്‍ 40,12,536 ഡോസുകളാണ് സ്വദേശികളും വിദേശികളുമായ താമസക്കാര്‍ക്കിടയില്‍ വിതരണം ചെയ്തത്. 12 വയസ്സിനും അതിന് മുകളിലും പ്രായമുള്ള 88.8 ശതമാനം പേര്‍ക്ക് ഇതിനകം ഒരു ഡോസ് വാക്സിന് ലഭിച്ചതായും ആരോഗ്യ മന്ത്രാലയം അറിയിച്ചു. വാക്സിനെടുക്കാന്‍ അര്‍ഹതയുള്ള ജനസംഖ്യയുടെ 74.9 ശതമാനം പേരും രണ്ട് ഡോസ് വാക്സിന് സ്വീകരിച്ചുകഴിഞ്ഞു. ഓരോ ദിവസവും ശരാശരി 20,000ത്തിനു മുകളില്‍ ഡോസുകളാണ് രാജ്യത്ത് വിതരണം ചെയ്യുന്നത്.
അതേസമയം രാജ്യത്തെ വാക്സിന് എടുക്കാന്‍ അര്‍ഹതയുള്ളവരും അല്ലാത്തവരുമായ മൊത്തം ജനസംഖ്യയുടെ 77 ശതമാനം പേര്‍ക്കും ഇതിനകം ഒരു ഡോസ് വാക്സിന് ലഭിച്ചു കഴിഞ്ഞു. മൊത്തം ജനസംഖ്യയുടെ 65 ശതമാനത്തിനാണ് രണ്ട് ഡോസ് വാക്സിനും ലഭിച്ചത്.
ഇതിനകം വാക്സിന് എടുത്ത എല്ലാവര്‍ക്കും നന്ദി അറിയിച്ച ഖത്തര്‍ ആരോഗ്യ മന്ത്രാലയം, ഇനിയും വാക്സിന് എടുക്കാത്തവര്‍ എത്രയും വേഗം അതിനായി മുന്നോട്ടുവരണമെന്ന് ആഹ്വാനം ചെയ്തു.
