ന്യൂഡല്ഹി: ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം തീവ്രന്യൂനമര്ദ്ദമായി ശക്തിപ്രാപിച്ചു. ന്യൂനമര്ദ്ദം നാളെ രാവിലെയോടെ ‘യാസ്’ ചുഴലിക്കാറ്റായി മാറും. മെയ് 26 ന് വൈകുന്നേരം വടക്കന് ഒഡിഷ- പശ്ചിമ ബംഗാള് തീരത്ത് എത്തി പാരദ്വീപിനും സാഗര് ദ്വീപിനും ഇടയില് കരയില് പ്രവേശിക്കാനാണ് സാധ്യത.
യാസ് ചുഴലിക്കാറ്റ് തീരം തൊടാനിടയുള്ള ഒഡീഷ, പശ്ചിമബംഗാള് ഉള്പ്പെടെയുള്ള സംസ്ഥാനങ്ങളിലെ സ്ഥിതി പ്രധാനമന്ത്രി വിലയിരുത്തി. കിഴക്കന് തീരങ്ങളിലെ സംസ്ഥാനങ്ങള്ക്ക് അതീവ ജാഗ്രതാ നിര്ദ്ദേശം കേന്ദ്രം നല്കി. മുംബൈ ബാര്ജ് അപകടത്തിന്റെ പശ്ചാത്തലത്തില് തീരത്ത് നിന്നും അകലെ ജോലി ചെയ്യുന്നവരുടെ സുരക്ഷ ഉറപ്പാക്കണമെന്ന് പ്രധാനമന്ത്രി നിര്ദ്ദേശിച്ചു.