ന്യൂഡല്ഹി: പൗരത്വനിയമഭേദഗതിക്കെതിരേ ഡല്ഹി ജുമാ മസ്ജിദിന് സമീപം പ്രതിഷേധം നടത്തിയതിന് അറസ്റ്റിലായ ഭീം ആര്മി നേതാവ് ചന്ദ്രശേഖര് ആസാദിന് ജാമ്യം . ഡല്ഹി തീസ് ഹസാരി കോടതിയാണ് ഉപാധികളോടെ ജാമ്യം അനുവദിച്ചത്. അഡീഷണല് സെഷന്സ് ജഡ്ജി കാമിനി ലോയാണ് ജാമ്യാപേക്ഷയില് വിധി പറഞ്ഞത്.
അടുത്ത നാല് ആഴ്ചത്തേക്ക് ഡല്ഹിയില് ഉണ്ടാകാന് പാടില്ല. ഈ ആഴ്ചകളിലെ എല്ലാ ശനിയാഴ്ചയും യുപിയിലെ സഹറന്പുര് പൊലീസ് സ്റ്റേഷനില് എത്തി ഒപ്പിടണം. കുറ്റപത്രം സമര്പ്പിക്കുന്ന എല്ലാ മാസത്തിലേയും അവസാന ശനിയാഴ്ച സ്റ്റേഷനിലെത്തണം. ചികിത്സക്കായി ഡല്ഹിയില് വരേണ്ടതുണ്ടെങ്കില് പൊലീസിനെ അറിയിക്കണം. സമരങ്ങള് ആസൂത്രണം ചെയ്തിട്ടുണ്ടെങ്കില് ഒരു മാസത്തേക്ക് വിട്ട് നില്ക്കണം. എന്നീ ഉപാദികളാണ് കോടതി മുന്നോട്ട് വെച്ചത്.
ജാമ്യാപേക്ഷയില് വാദം കേള്ക്കുന്നതിനിടെ ഡല്ഹി പൊലീസിനെതിരെ കോടതി രൂക്ഷ വിമര്ശനം നടത്തിയിരുന്നു. പ്രതിഷേധിക്കാനുള്ള അവകാശം ഭരണഘടനാപരമാണെന്ന് കോടതി ചൂണ്ടിക്കാട്ടുകയുണ്ടായി. ചന്ദ്രശേഖര് മുമ്പ് കുറ്റകൃത്യങ്ങളിലും പങ്കാളിയായിട്ടുണ്ട്. ഇതും കൂടി പരിഗണിക്കണമെന്ന് ഇമെയില് അയച്ചിരുന്നെങ്കിലും പരിഗണിച്ചില്ലെന്ന് പ്രോസിക്യൂഷന് ചൂണ്ടിക്കാട്ടി.
ഡിസംബര് 20-നുനടന്ന പ്രതിഷേധത്തില് പങ്കെടുത്ത ആസാദിനെ ഡിസംബര് 21-ന് പുലര്ച്ചെ നാടകീയമായിട്ടാണ് ചന്ദ്രശേഖര് ആസാദിനെ പൊലീസ് അറസ്റ്റ് ചെയ്തത്.