ഡല്ഹി മദ്യനയ അഴിമതി കേസില് ബിആര്എസ് നേതാവ് കെ കവിതയെ ചോദ്യം ചെയ്യാന് വിളിപ്പിച്ച് സിബിഐ. ഈ മാസം 26ന് ചോദ്യം ചെയ്യലിന് ഹാജരാകണമെന്നാണ് നിര്ദേശം. ഇത് രണ്ടാം തവണയാണ് കവിതയെ കേന്ദ്ര ഏജന്സി ചോദ്യം ചെയ്യലിന് വിളിപ്പിക്കുന്നത്. കഴിഞ്ഞ ഡിസംബറില് ഇവരെ സിബിഐ ചോദ്യം ചെയ്തിരുന്നു.
അതേസമയം മദ്യനയ അഴിമതി കേസില് ഹാജരാകണമെന്ന് ആവശ്യപ്പെട്ട് ഡല്ഹി മുഖ്യമന്ത്രി അരവിന്ദ് കെജ്രിവാളിന് എന്ഫോഴ്സമെന്റ് ഡയറക്ടറേറ്റ് നോട്ടീസ് അയച്ചിരുന്നുവെങ്കിലും ഹാജരായിരുന്നില്ല. ആറാം തവണയാണ് കെജ്രിവാള് ചോദ്യം ചെയ്യലിന് ഹാജരാകാതിരിക്കുന്നത്. ഫെബ്രുവരി ഏഴിന് ഹാജരാകണമെന്നായിരുന്നു നിര്ദേശം.
കഴിഞ്ഞ നാല് മാസത്തിനിടെ ആറ് സമന്സുകളാണ് എന്ഫോഴ്സ്മെന്റ് ഡയറക്ടറേറ്റ് കെജ്രിവാളിന് അയച്ചത്. രാഷ്ട്രീയ പ്രേരിതമെന്ന് ആരോപിച്ച് കെജ്രിവാള് ഈ നോട്ടീസുകള് തള്ളുകയായിരുന്നു. 2021-22 കാലത്തെ ഡല്ഹി സര്ക്കാരിന്റെ മദ്യ നയത്തില് പക്ഷപാതപരമായ കൃത്രിമം നടന്നു എന്ന ആരോപണമാണ് കേസിന് ആധാരം.