തിരുവനന്തപുരം: വിവാദ കാര്ഷിക നിയമങ്ങള് കേന്ദ്രം പിന്വലിച്ചത് കര്ഷക സമരത്തിന്റെ വിജയമാണെന്ന് എളമരം കരീം എംപി. യുപി- ഉത്തരാഖണ്ഡ് തിരഞ്ഞെടുപ്പുകളില് പരാജയപ്പെടുമെന്ന ഭീതിയെ തുടര്ന്നാണ് സര്ക്കാരിന്റെ ഒളിച്ചോട്ടം. ബില്ലുകള് പിന്വലിക്കാനുള്ള തീരുമാനം ഭീരുത്വത്തില് നിന്നുണ്ടായതാണെന്നും അല്ലാതെ കര്ഷകരുടെ താല്പര്യം സംരക്ഷിക്കാനല്ലെന്നും അദ്ദേഹം പറഞ്ഞു. ബില്ലുകള് പിന്വലിക്കാന് സര്ക്കാര് നിര്ബന്ധിതരാകുകയായിരുന്നുവെന്നും അദ്ദേഹം കൂട്ടിച്ചേര്ത്തു.
കര്ഷകര് ഒറ്റക്കെട്ടായി നടത്തിയ സമരം അടിച്ചമര്ത്താനാണ് സര്ക്കാര് ശ്രമിച്ചത്. ഖാലിസ്ഥാന് തീവ്രവാദികളാണ്, മാവോവാദികളാണ്, അര്ബന് നക്സലൈറ്റുകളാണ് എന്നൊക്കെയുള്ള ആരോപണം ഉന്നയിക്കുകയും പൊലീസിനെ ഉപയോഗിച്ച് ശക്തമായി അടിച്ചമര്ത്താന് ശ്രമിക്കുകയും ചെയ്തു. ഹരിയാനയില് പൊലീസ് അതിക്രമത്തില് കര്ഷകര് കൊല്ലപ്പെട്ടു, ലഖിംപുരില് വാഹനമിടിച്ചുകയറ്റി കര്ഷകരെ കൊലപ്പെടുത്തി. സമര കേന്ദ്രങ്ങളിലും ആയിരത്തോളം കര്ഷകരാണ് കൊല്ലപ്പെട്ടത്. കടുത്ത പ്രയാസങ്ങള് അതിജീവിച്ചുകൊണ്ടാണ് സമരങ്ങള് തുടര്ന്നുവന്നത്.
മാത്രമല്ല, ഒരു വര്ഷത്തിനിടയില് ഒരു തവണ പോലും കര്ഷകസംഘടനാ പ്രതിനിധികളോട് സംസാരിക്കാന് പ്രധാനമന്ത്രി തയ്യാറായിട്ടില്ല. കൃഷിവകുപ്പ് മന്ത്രി ചര്ച്ച നടത്തിയെങ്കിലും അതിലൊന്നും ഒരു തീരുമാനവുമെടുക്കാന് കഴിയില്ലെന്ന് എല്ലാവര്ക്കും അറിയാമായിരുന്നു. സുപ്രീം കോടതി നിയമം സ്റ്റേ ചെയ്യുകയും ഒരു കമ്മീഷനെ വെക്കാന് തീരുമാനിക്കുകയും ചെയ്തു. പക്ഷേ, കമ്മീഷനുമായി സഹകരിക്കേണ്ട എന്ന തീരുമാനമാണ് കര്ഷകസംഘടനകള് എടുത്തത്.
കേരളം, തമിഴ്നാട്, ബംഗാള്, അസം തിരഞ്ഞെടുപ്പികള് വലിയ തിരിച്ചടിയാണ് ബിജെപിക്ക് നേരിട്ടത്. കഴിഞ്ഞ പാര്ലമെന്റ്-അസംബ്ലി ഉപതിരഞ്ഞെടുപ്പുകളില് ബിജെപിക്ക് കടുത്ത തിരിച്ചടിയുണ്ടായി. വരാന് പോകുന്ന യുപി, ഉത്തരാഖണ്ഡ് തിരഞ്ഞെടുപ്പുകളില് പരാജയപ്പെടുമെന്ന ഭീതിയെ തുടര്ന്നാണ് ഈ ഒളിച്ചോട്ടം. അല്ലാതെ കര്ഷകരുടെ താല്പര്യം സംരക്ഷിക്കാനല്ല. ബിജെപിയെ തോല്പിക്കാനായി സംയുക്ത കര്ഷകസമിതി മിഷന് യുപി, മിഷന് ഉത്തരാഖണ്ഡ് എന്നിങ്ങനെ രണ്ട് പദ്ധതി പ്രഖ്യാപിച്ചിട്ടുണ്ട്.ഈ സാഹചര്യത്തില് ഗവണ്മെന്റ് നിര്ബന്ധിതമായതാണ് ഈ പിന്നോക്കമെന്നും എളമരം കരീം പറഞ്ഞു.