ആധുനിക ക്രിക്കറ്റിൽ തനിക്ക് ഏറ്റവും പ്രിയപ്പെട്ട ബാറ്റ്സ്മാൻ ആരെന്ന് പ്രഖ്യാപിച്ചിരിക്കുകയാണ് ദക്ഷിണാഫ്രിക്കൻ സൂപ്പർതാരം ഡേവിഡ് മില്ലർ. ഇന്ത്യൻ നായകൻ വിരാട് കോലിയാണ് മില്ലറുടെ പ്രിയ ബാറ്റ്സ്മാൻ.
ട്വിറ്ററിൽ ഒരു ആരാധകൻെറ ചോദ്യത്തിന് ഉത്തരമായാണ് മില്ലർ കോലിയുടെ പേര് പറഞ്ഞത്. മൂന്ന് ഫോർമാറ്റിലും ഒരുപോലെ തിളങ്ങുന്ന കോലി മിക്ക റെക്കോർഡുകളും തൻെറ പേരിലാക്കി മാറ്റുകയാണ്. ടെസ്റ്റിൽ കോലിക്ക് വെല്ലുവിളിയായി സ്മിത്തും വില്യംസണുമെല്ലാമുണ്ട്. ഏകദിനത്തിൽ സഹതാരം രോഹിത് ശർമ തന്നെയുണ്ട്. ടി20യിൽ ബാബർ അസം അടക്കമുള്ള ബാറ്റ്സ്മാൻമാരും.
എന്നാൽ മൂന്ന് ഫോർമാറ്റിലും മുന്നിൽ തന്നെ കോലിയുണ്ട്. മികച്ച സാങ്കേതികത്തികവും ആക്രമണോത്സുകതയും ചേരുന്നതാണ് കോലിയുടെ ബാറ്റിങ്. താൻ കണ്ടിട്ടുള്ള ഏറ്റവും മികച്ച ഫിനിഷർ മുൻ ഇന്ത്യൻ നായകൻ എംഎസ് ധോണിയാണെന്നും ട്വിറ്ററിൽ മറ്റൊരു ചോദ്യത്തിന് ഉത്തരമായി മില്ലർ പറഞ്ഞു
