തൊട്ടില്‍പ്പാലം: രാത്രിയില്‍ അജ്ഞാതന്റെ വിളയാട്ടം മൂലം ആശങ്കയിലായിരിക്കുകയാണ് മലയോര പ്രദേശങ്ങളിലെ ജനങ്ങള്‍. കാവിലുമ്പാറയിലെ ചീത്തപ്പാട്, ആശ്വാസി, നാഗംപാറ ഭാഗങ്ങളിലെ സ്ത്രീകളെയും കുട്ടികളെയുമാണ് അജ്ഞാതന്‍ വട്ടം കറക്കുന്നത്. വീട്ടിലെ പുരുഷന്മാര്‍ക്കാകട്ടെ ഉറക്കമില്ലാ രാത്രികളാണ് ഈ അജ്ഞാതന്‍ സമ്മാനിക്കുന്നത്.
രാത്രിയില്‍ വീടിനു പുറത്തിറങ്ങുന്ന സ്ത്രീകളെ പാത്തിരുന്ന് മുഖത്തടിക്കുന്നതായാണ് നാട്ടുകാരുടെ പരാതി. വീട്ടിലെ മെയിന്‍സ്വിച്ച് ഓഫാക്കുക, വാതിലില്‍ മുട്ടുക, അപശബ്ദങ്ങള്‍ പുറപ്പെടുവിച്ച് ആളുകളെ വിരട്ടുക, വീടിന് പരിസരത്ത് മലമൂത്രവിസര്‍ജനം നടത്തുക തുടങ്ങിയ സംഭവങ്ങളുമുണ്ടായതായും അവര്‍ പറയുന്നു.
നാട്ടുകാര്‍ പോലീസില്‍ പരാതിപ്പെട്ടെങ്കിലും ഫലമുണ്ടായില്ല. ഇതേതുടര്‍ന്ന് നാട്ടുകാര്‍ ഇയാളെ കൈയോടെ പിടികൂടാന്‍ രാത്രിയില്‍ ഉറക്കമിളച്ച് കാത്തിരിക്കുകയാണ്. നാടിനെ വിറപ്പിക്കുന്ന അജ്ഞാതനെന്ന സംശയത്തില്‍ കഴിഞ്ഞ ദിവസം വയനാട് റോഡില്‍ യുവാവിനെ നാട്ടുകാര്‍ പിടികൂടി തൊട്ടില്‍പ്പാലം പോലീസിന് കൈമാറുകയുണ്ടായി. പിന്നീട് ഇയാള്‍ നിരപരാധിയാണെന്ന് തെളിഞ്ഞതിനാല്‍ വിട്ടയക്കുകയായിരുന്നു.
