അരൂര്: ഈശ്വര വിശ്വാസങ്ങള് ഇല്ലാതാക്കാന് ഇടതുപക്ഷ സര്ക്കാര് നിലകൊണ്ടുവെന്ന എന്എസ്എസിന്റെ ആരോപണത്തിന് മറുപടിയുമായി സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന്. ശബരിമലയില് പോകുന്നവരുടെ എണ്ണം നോക്കിയാല് ഒന്നാം സ്ഥാനത്ത് കമ്മ്യൂണിസ്റ്റുകാര് ആയിരിക്കുമെന്ന് അദ്ദേഹം പറഞ്ഞു.
എല്ഡിഎഫ് ഒരു വിശ്വാസികള്ക്കും എതിരല്ലെന്നും എന്നാല് തിരഞ്ഞെടുപ്പില് നിലപാട് സ്വീകരിക്കാന് എന്.എസ്.എസിന് അധികാരമുണ്ടെന്നും കോടിയേരി പറഞ്ഞു.ഇടതുപക്ഷ സര്ക്കാര് നവോത്ഥാനത്തിന്റെ പേരില് ജനങ്ങളില് വിഭാഗീയത വളര്ത്തിയും ജാതി-മതചിന്തകള് ഉണര്ത്തിയും മുന്നാക്ക-പിന്നാക്ക ചേരിതിരിവുണ്ടാക്കി രാഷ്ട്രീയ മുതലെടുപ്പിന് ശ്രമിക്കുകയാണെന്ന് എന്.എസ്.എസ്. ജനറല് സെക്രട്ടറി ജി. സുകുമാരന്നായര് ആരോപിച്ചിരുന്നു.
ഒരു വിഭാഗത്തെ താലോലിക്കുകയും അവരെ പ്രീതിപ്പെടുത്താന് മുന്നാക്കവിഭാഗത്തെ മാത്രം ബോധപൂര്വമായി അവഗണിക്കുകയുമാണ് സംസ്ഥാനസര്ക്കാര് ഇപ്പോള് ചെയ്തുകൊണ്ടിരിക്കുന്നതെന്നും അദ്ദേഹം പറഞ്ഞിരുന്നു.