കൊച്ചി : തീരദേശ പരിപാലന നിയമം പാലിക്കപ്പെടണമെന്ന നിലപാടാണ് സി.പി.ഐക്കുള്ളതെന്ന് പാര്‍ട്ടി എറണാകുളം ജില്ല സെക്രട്ടറി പി.രാജു. മരടിലെ ഫ്ളാറ്റുകള് പൊളിക്കുന്നതുമായി ബന്ധപ്പെട്ട വിഷയം സങ്കീര്‍ണമാണെന്നും ഫ്‌ളാറ്റിലെ ഉടമകള്‍ വഞ്ചിക്കപ്പെട്ടവരാണെന്നും രാജു പറഞ്ഞു.
ഫ്‌ലാറ്റുടമകള്‍ നിരുപാധികം ഫ്‌ലാറ്റുകള്‍ വിട്ടൊഴിയണമെന്ന നിലപാട് സിപിഐക്കില്ല. പ്രശ്‌നത്തില്‍ മുഖ്യമന്ത്രി അടിയന്തരമായി ഇടപെടണമെന്നും വിഷയത്തില്‍ സര്‍വകക്ഷി യോഗം വിളിക്കണമെന്നും പി.രാജു ആവശ്യപ്പെട്ടു.
അതേസമയം, മരടിലെ ഫ്ളാറ്റ് ഉടമകള്‍ക്കു വിവിധ രാഷ്ട്രീയ പാര്‍ട്ടികള്‍ പൂര്‍ണ പിന്തുണ പ്രഖ്യാപിച്ചുകഴിഞ്ഞു. പ്രതിപക്ഷ നേതാവ് രമേശ് ചെന്നിത്തല, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍, ബിജെപി സംസ്ഥാന ജനറല്‍ സെക്രട്ടറി എ.എന്‍. രാധാകൃഷ്ണന്‍ എന്നിവരടക്കം ഫ്ളാറ്റിലെത്തി ഉടമകളുമായി കൂടിക്കാഴ്ച നടത്തി പിന്തുണ പ്രഖ്യാപിച്ചു.
ഫ്ളാറ്റുകള് പൊളിക്കാനുള്ള സുപ്രീംകോടതിവിധി നിര്‍വീര്യമാക്കണമെന്ന് ആവശ്യപ്പെട്ടു രാഷ്ട്രപതി, ഉപരാഷ്ട്രപതി, പ്രധാനമന്ത്രി, കേരള ഗവര്‍ണര്‍, സ്പീക്കര്‍ എന്നിവര്‍ക്കടക്കം നല്‍കിയ സങ്കടഹര്‍ജിയിന്‍മേലുള്ള തീരുമാനം ഫ്ളാറ്റ് ഉടമകള്‍ കാത്തിരിക്കുകയാണ്. വിഷയത്തില്‍ ഇടപെടുമെന്നു കേരള ഗവര്‍ണര്‍ വ്യക്തമാക്കിയിട്ടുണ്ട്.
