കാസര്ഗോഡ്: കാസര്ഗോഡ് വനിതാ മതിലിനിടയില് സിപിഐഎമ്മും ബിജെപിയും തമ്മില് ഏറ്റുമുട്ടലുണ്ടായി. നിരവധി സ്ത്രീകള് പരിപാടിയില് പങ്കെടുത്തുകൊണ്ടിരിക്കുന്നതിനിടെയാണ് ആക്രമണം ഉണ്ടായത്. സംഘര്ഷത്തെ തുടര്ന്ന് പൊലീസ് ലാത്തിവീശി.
വൈകിട്ട് നാല് മണിക്ക് കാസര്ഗോഡ് മുതല് തിരുവനന്തപുരം വരെയാണ് മതില് തീര്ത്തത്. ലക്ഷക്കണക്കിന് സ്ത്രീകളാണ് മതിലില് പങ്കെടുക്കാന് എത്തിയത്. അണിനിരന്നവര് നവോത്ഥാന സംരക്ഷണ പ്രതിജ്ഞ ഏറ്റുചൊല്ലി. കാസര്ഗോഡ് മുതല് തിരുവനന്തപുരം വരെ 620 കിലോമീറ്റര് നീളത്തില് ദേശീയ പാതയുടെ പടിഞ്ഞാറ് ഭാഗത്താണ് മതില് തീര്ത്തത്. 3.45 ന് മതിലിന്റെ റിഹേഴ്സല് നടത്തിയിരുന്നു.
വനിതാ മതിലിന് അടിസ്ഥാനം ശബരിമല വിധിയെന്ന് മുഖ്യമന്ത്രി പിണറായി വിജയന് വെളിപ്പെടുത്തിയിരുന്നു. ശബരിമല വിധിക്ക് ശേഷം ഉയര്ന്ന വിവാദങ്ങള്ക്കും വിമര്ശനങ്ങള്ക്കുമെല്ലാമുള്ള മറുപടി വനിതാ മതിലിലൂടെ നല്കുകയാണ് സര്ക്കാര്. വനിതാ മതിലിന് പിന്തുണയുമായി വിഎസ് അച്യുതാനന്ദനും എത്തിയിരുന്നു.