സൗദിയില്‍ സിറിഞ്ചില്‍ വാക്‌സിനില്ലാതെ യുവാവിന് കുത്തിവെയ്‌പ്പെടുത്തു

റിയാദ്: സൗദിയില്‍ യുവാവിന് നഴ്‌സ് കുത്തിവെയ്പ് എടുത്തത് സിറിഞ്ചില്‍ വാക്‌സിനില്ലാതെ. റിയാദ് മെഡിക്കല്‍ കോളജിലെ നഴ്‌സിനാണ് പിഴവ് പറ്റിയതെന്ന് ആരോഗ്യ അധികൃതര്‍ പറഞ്ഞു. ഒരു മാസം മുമ്പാണ് സംഭവം നടന്നത്.

സിറിഞ്ചില്‍ വാക്‌സിനില്ലാതെ കുത്തിവെയ്പ് എടുക്കുന്ന വീഡിയോ സോഷ്യല്‍ മീഡിയയില്‍ വൈറലായിരുന്നു. വീഡിയോ പകര്‍ത്തി സോഷ്യല്‍ മീഡിയയില്‍ പങ്കുവെച്ചതിന് പിന്നാലെയാണ് സംഭവത്തെ കുറിച്ച് പുറംലോകം അറിയുന്നത്. റിയാദിലെ സ്വകാര്യ മെഡിക്കല്‍ കോളജിലെ ഏഷ്യന്‍ ഹെല്‍ത്ത് പ്രാക്ടീഷണറാണ് വാക്‌സിന്‍ നിറക്കാതെ സിറിഞ്ച് കുത്തിവെച്ചത്. മാനദണ്ഡങ്ങള്‍ പാലിക്കാതെ കുത്തിവെയ്പ് എടുത്ത നഴ്‌സിനെ സസ്‌പെന്‍ഡ് ചെയ്തിരുന്നതായി റിയാദ് ആരോഗ്യ വിഭാഗം പ്രസ്താവനയിലൂടെ പറഞ്ഞു.

നഴ്‌സിന്റെ ഭാഗത്ത് നിന്നുണ്ടായ പിഴവ് സ്വീകാര്യമല്ലെന്നും ആരോഗ്യ മന്ത്രാലയം പുറപ്പെടുവിച്ച മാനദണ്ഡങ്ങള്‍ ലംഘിച്ചെന്നും ആരോഗ്യ വിഭാഗം വ്യക്തമാക്കി. സംഭവത്തെ കുറിച്ച് നഴ്‌സിന്റെ മേലുദ്യോഗസ്ഥരെ അറിയിച്ചിട്ടുണ്ട്. അന്വേഷണത്തിന് ഉത്തരവിട്ട ഉദ്യോഗസ്ഥര്‍ നഴ്‌സിനെതിരെ വേണ്ട നിയമനടപടികള്‍ കൈക്കൊള്ളുമെന്ന് പ്രസ്താവനയിലൂടെ അറിയിച്ചു.

Top