ആരോഗ്യപ്രവര്‍ത്തകരുടെ എതിര്‍പ്പുകള്‍ അവഗണിച്ച് ബ്രിട്ടണില്‍ കൊവിഡ് നിയന്ത്രണങ്ങള്‍ നീക്കി. മാസ്‌ക്, സാമൂഹിക അകലം തുടങ്ങി കൊവിഡിന്റേതായി ഏര്‍പ്പെടുത്തിയിരുന്ന എല്ലാ നിയന്ത്രണങ്ങള്‍ക്കും ഇളവ് നല്‍കിയിട്ടുണ്ട്. യുകെ സര്‍ക്കാരിനെ ഉദ്ധരിച്ച് വാര്‍ത്താ ഏജന്‍സിയായ എഎഫ്പി ആണ് വാര്‍ത്ത റിപ്പോര്‍ട്ട് ചെയ്തത്.
നൈറ്റ് ക്ലബുകള്‍ക്കും ഇന്‍ഡോര്‍ ക്ലബുകള്‍ക്കുമൊക്കെ തുറന്നുപ്രവര്‍ത്തിക്കാം. സാമൂഹിക അകലമോ പരിമിതമായ ആളുകളോ ആവശ്യമില്ല. മാസ്‌ക് അണിയുന്നതും വര്‍ക്ക് ഫ്രം ഹോമും ഒഴിവാക്കി. ജനസംഖ്യയുടെ മൂന്നില്‍ രണ്ട് ആളുകളും വാക്‌സിന്‍ സ്വീകരിച്ചതിനാലാണ് ഇളവ് നല്‍കുന്നതെന്ന് പ്രധാനമന്ത്രി ബോറിസ് ജോണ്‍സണ്‍ വ്യക്തമാക്കി. ആരോഗ്യമന്ത്രിക്ക് കൊവിഡ് സ്ഥിരീകരിച്ചതിനാല്‍ അദ്ദേഹം ഇപ്പോള്‍ ക്വാറന്റീനിലാണ്.
ആരോഗ്യപ്രവര്‍ത്തരും പ്രതിപക്ഷ പാര്‍ട്ടികളും തീരുമാനത്തെ വിമര്‍ശിച്ച് രംഗത്തെത്തിയിട്ടുണ്ട്. ദിവസേന 50,000നു മുകളില്‍ കൊവിഡ് കേസുകള്‍ റിപ്പോര്‍ട്ട് ചെയ്യുന്ന സാഹചര്യത്തില്‍ ഇളവുകള്‍ അനുവദിക്കുന്നത് വലിയ പ്രതിസന്ധിയുണ്ടാക്കും എന്നാണ് വിമര്‍ശനം. അതേസമയം, ഇപ്പോള്‍ ഇളവുകള്‍ നല്‍കിയില്ലെങ്കില്‍ ഒരിക്കലും നല്‍കാനാവില്ലെന്ന് ബോറിസ് ജോണ്‍സണ്‍ പറഞ്ഞു.
