അഹമ്മദാബാദ്: ഐപിഎല്ലിനെ പിടിച്ചുകുലുക്കി വീണ്ടും കോവിഡ് ഭീതി. രണ്ടു താരങ്ങള്‍ക്ക് കോവിഡ് പോസിറ്റീവ് ആയതിനാല്‍ ഇന്നത്തെ കൊല്‍ക്കത്ത നൈറ്റ് റൈഡേഴ്‌സ് – റോയല്‍ ചലഞ്ചേഴ്‌സ് ബാംഗ്ലൂര്‍ മത്സരം മാറ്റി. മത്സരം മറ്റൊരു ദിവസം നടത്തുമെന്നാണ് വിവരം.
കൊല്‍ക്കത്ത നൈറ്റ് റൈഡേഴ്‌സിലെ വരുണ്‍ ചക്രവര്‍ത്തി, സന്ദീപ് വാര്യര്‍ എന്നിവര്‍ക്കാണ് കോവിഡ് സ്ഥിരീകരിച്ചതെന്നാണ് റിപ്പോര്‍ട്ട്. എന്നാല്‍ ഇക്കാര്യത്തില്‍ ബിസിസിഐയുടെ ഔദ്യോഗിക സ്ഥിരീകരണം വന്നിട്ടില്ല.
രണ്ടു മത്സരാര്‍ഥികള്‍ക്ക് കോവിഡ് പോസിറ്റീവ് ആയിട്ടുണ്ടെന്നും എന്നാല്‍ രണ്ടാമത്തെ പരിശോധനയ്ക്കു ശേഷമേ സ്ഥിരീകരിക്കുകയുള്ളൂവെന്നുമാണ് അധികൃതര്‍ അറിയിച്ചതെന്നാണ് വാര്‍ത്ത ഏജന്‍സി റിപ്പോര്‍ട്ട് ചെയ്തത്.
നിലവില്‍ ഈ രണ്ടു താരങ്ങളുമായി സമ്പര്‍ക്കത്തില്‍ ഏര്‍പ്പെട്ടവര്‍ പരിശോധനയ്ക്ക് വിധേയരാവണമെന്നാണ് അറിയിച്ചിരുക്കുന്നതെന്നാണ് റിപ്പോര്‍ട്ട്. വരുണിന്റെയും സന്ദീപിന്റെയും രണ്ടാമത്തെ പരിശോധനാ ഫലം വൈകുന്നേരത്തിനു മുന്‍പ് ലഭിക്കാത്തതിനാലാണ് മത്സരം മാറ്റുന്നതെന്നും റിപ്പോര്‍ട്ടുകളുണ്ട്.
ഈ വര്‍ഷത്തെ ഐപിഎല്‍ സീസണിന്റെ ആദ്യം ഡല്‍ഹിയുടെ പേസര്‍ ആന്റിക് നോര്‍ട്യേയ്ക്ക് കോവിഡ് സ്ഥിരീകരിക്കുകയും പിന്നീട് ആര്‍ടിപിസിആര്‍ പരിശോധനയില്‍ ഫലം തെറ്റാണെന്നു കണ്ടെത്തുകയും ചെയ്തിരുന്നു.
