കൊച്ചി: കരിപ്പൂര് സ്വര്ണക്കടത്ത് കേസ് പ്രതി അര്ജുന് ആയങ്കിയുടെ കസ്റ്റഡി നീട്ടി കിട്ടാന് കസ്റ്റംസ് നല്കിയ അപേക്ഷ തള്ളി കോടതി. ടിപി ചന്ദ്രശേഖരന് വധക്കേസിലെ പ്രതി മുഹമ്മദ് ഷാഫിക്കൊപ്പം അര്ജുന് ആയങ്കിയേയും ചോദ്യം ചെയ്യണമെന്ന ആവശ്യവും കോടതി നിരസിച്ചു.
ഏഴ് ദിവസത്തെ കസ്റ്റഡി കാലാവധി കഴിഞ്ഞതിനെ തുടര്ന്ന് അര്ജുന് ആയങ്കിയെ ഇന്ന് കൊച്ചിയിലെ സാമ്പത്തിക കുറ്റകൃത്യങ്ങള് കൈകാര്യം ചെയ്യുന്ന കോടതിയില് ഹാജരാക്കിയിരുന്നു. ഏഴ് ദിവസത്തേക്ക് കൂടി കസ്റ്റഡി നീട്ടികിട്ടണമെന്നായിരുന്നു കസ്റ്റംസിന്റെ ആവശ്യം. എന്നാല് ഈ അപേക്ഷയാണ് കോടതി തള്ളിയത്.
അര്ജുന് ആയങ്കി നല്കിയ മൊഴികളില് വൈരുദ്ധ്യമുണ്ട്. സ്വര്ണക്കടത്തിന് ടി.പി ചന്ദ്രശേഖരന് വധക്കേസിലെ പ്രതികളായ കൊടി സുനിയുടേയും ഷാഫിയുടേയും സംരക്ഷണമുണ്ട്. കൂടുതല് അന്വേഷണത്തിനായി ടി.പി കേസില് പരോളിലുള്ള പ്രതി മുഹമ്മദ് ഷാഫിക്കൊപ്പം നാളെ അര്ജുന് ആയങ്കിയേയും ചോദ്യം ചെയ്യേണ്ടതുണ്ടെന്നാണ് കസ്റ്റംസ് കോടതിയെ അറിയിച്ചത്.