റോം: കൊറോണ വൈറസ് ബാധയില്ലെന്ന സാക്ഷ്യപത്രം ഇല്ലെന്ന കാരണത്താല്‍ ഇറ്റലിയില്‍നിന്ന് ഇന്ത്യയിലേക്ക് മടങ്ങാന്‍ ടിക്കറ്റെടുത്ത മലയാളികള്‍ ഉള്‍പ്പെടെ നാല്‍പ്പതോളം പേര്‍ വിമാനത്താവളത്തില്‍ കുടുങ്ങിക്കിടക്കുന്നു. കൊറോണ വൈറസ് ബാധയില്ലെന്ന സാക്ഷ്യപത്രം നല്‍കിയാല്‍മാത്രമേ ഇന്ത്യയിലേക്ക് മടങ്ങാനാവൂ എന്ന കേന്ദ്ര വ്യോമയാനമന്ത്രാലയത്തിന്റെ ഉത്തരവാണ് ഇവരുടെ യാത്രയ്ക്ക് വിലങ്ങുതടിയാവുന്നത്.
മലയാളികളും കുട്ടികളും ഗര്‍ഭിണികളുമുള്‍പ്പെടെയുള്ള സംഘമാണ് വിമാനത്താവളത്തില്‍ കുടുങ്ങിക്കിടക്കുന്നത്. ഇവരുടെ വീഡിയോ സന്ദേശം പുറത്തുവന്നിട്ടുണ്ട്. ഇറ്റലിയില്‍ കൊറോണ വൈറസ് ബാധ പടര്‍ന്നുപിടിക്കുന്ന സാഹചര്യത്തിലാണ് ഇവര്‍നാട്ടിലേക്ക് മടങ്ങാന്‍ ടിക്കറ്റെടുത്തത്. എന്നാല്‍ ഇറ്റലിയില്‍ കൊറോണയില്ലെന്ന സാക്ഷ്യപത്രം നല്‍കുന്നില്ല. നാട്ടിലെത്തിയാല്‍ സര്‍ക്കാര്‍ നിര്‍ദേശിക്കുന്ന തരത്തില്‍ എല്ലാ മുന്‍കരുതലുകളും സ്വീകരിക്കാമെന്ന് വിമാനത്താവളത്തില്‍ കുടുങ്ങിയ സംഘം പറയുന്നു.
