മുംബൈയില്‍ കൊവിഡ് ബാധിച്ച് ഒരുമലയാളി കൂടി മരിച്ചു; മതൃദേഹം സംസ്‌കരിച്ചത് 9 മണിക്കൂറിന് ശേഷം

മുംബൈ: മുംബൈയില്‍ കൊവിഡ് ബാധിച്ച് ഒരു മലയാളി കൂടി മരിച്ചു. തിരുവല്ല മല്ലപ്പള്ളി സ്വദേശി മത്തായി വര്‍ഗീസ് (56) ആണ് മരിച്ചത്. കാന്തിവലിയിലെ ഫ്‌ലാറ്റില്‍ വച്ച് ഇന്ന് രാവിലെയാണ് മത്തായി മരിച്ചത്. ഭാര്യ ഏലിയാമ്മ മാത്രമാണ് ഒപ്പമുണ്ടായിരുന്നത്. കൊവിഡ് ലക്ഷണങ്ങളുണ്ടായിരുന്നതിനാല്‍ മൃതദേഹം മാറ്റാന്‍ ആരും സഹായിച്ചില്ല. മരിച്ച് ഒമ്പതു മണിക്കൂറിനു ശേഷമാണ് സ്രവ പരിശോധനാഫലം വന്നത്. അതുകഴിഞ്ഞാണ് കോര്‍പ്പറേഷന്‍ ജീവനക്കാരെത്തി മൃതദേഹം സംസ്‌കരിക്കാന്‍ കൊണ്ടുപോയത്.

മുംബൈയില്‍ കൊവിഡ് ബാധിച്ച് മരിച്ചവരുടെ എണ്ണം 1000 കടന്നിരിക്കുകയാണ്. 1026 പേര്‍ രോഗ ബാധിതരായി മരിച്ചെന്നാണ് ഔദ്യോഗിക കണക്ക്. മഹാരാഷ്ട്രയില്‍ കൊവിഡ് ബാധിതരുടെ എണ്ണം 50,000 കടന്നു. ഇതുവരെ 52,667 പേര്‍ക്കാണ് രോഗം സ്ഥിരീകരിച്ചത്. 2,436 പുതിയ കേസുകളാണ് ഇന്ന് റിപ്പോര്‍ട്ട് ചെയ്തത്. 60 പേരാണ് രോഗം ബാധിച്ച് ഇന്ന് മരിച്ചത്. ഇതോടെ ആകെ മരണം 1,695 ആയി.

Top