ഡല്‍ഹി: രാഹുല്‍ ഗാന്ധിയുടെ അയോഗ്യത നീക്കാനുള്ള നടപടികള്‍ വേഗത്തിലാക്കാനുള്ള നടപടിയുമായി കോണ്‍ഗ്രസ് നേതൃത്വം. ഇത് സംബന്ധിച്ച് ലോക്‌സഭ സെക്രട്ടറിയേറ്റിന് കോണ്‍ഗ്രസ് നേതൃത്വം വീണ്ടും കത്തു നല്‍കി. വിജ്ഞാപനമിറക്കുന്നത് നീട്ടിക്കൊണ്ട് പോയാല്‍ വീണ്ടും കോടതിയെ സമീപിക്കാനാണ് പാര്‍ട്ടി നേതാക്കളുടെ ആലോചന. കോണ്‍ഗ്രസ് പ്രവര്‍ത്തകസമിതി പ്രഖ്യാപനം വൈകില്ലെന്നും സൂചനയുണ്ട്.
കോണ്‍ഗ്രസ് നേതാവ് അധിര്‍ രഞ്ജന്‍ ചൗധരിയാണ് ലോക്‌സഭാ സ്പീക്കര്‍ക്ക് വീട്ടിലെത്തി കത്ത് നല്‍കിയത്. കോടതി ഉത്തരവ് ലോക്‌സഭാ സെക്രട്ടേറിയേറ്റില്‍ എത്തിച്ചതായും കോണ്‍ഗ്രസ് നേതാക്കള്‍ വ്യക്തമാക്കി. ദില്ലി തുഗ്ലക് ലൈനില്‍ രാഹുല്‍ ഗാന്ധിയുടെ ഔദ്യോഗിക വസതി അദ്ദേഹത്തിന് തിരികെ നല്‍കണമെന്ന ആവശ്യവും നേതാക്കള്‍ക്കുണ്ട്. ഇക്കാര്യവും ലോക്‌സഭാ സെക്രട്ടേറിയേറ്റിന് മുന്നില്‍ വെക്കും.
