കൊച്ചി: അക്കൗണ്ട് ഉടമകള്ക്ക് നല്കുന്ന ചെക്ക് ലീഫിന്റെ യഥാര്ഥമെന്നു തോന്നിക്കുന്ന പകര്പ്പുണ്ടാക്കി (ക്ലോണിങ്) ബാങ്കുകളില്നിന്നു കോടികളുടെ തട്ടിപ്പ് നടത്തുന്നു. പഞ്ചാബ് നാഷനല് ബാങ്ക്, സെന്ട്രല് ബാങ്ക് ഓഫ് ഇന്ത്യ, യൂണിയന് ബാങ്ക് ഓഫ് ഇന്ത്യ, കാനറ ബാങ്ക് എന്നിവിടങ്ങളില് നിന്ന് 2.6 കോടിയിലേറെ രൂപയുടെ തട്ടിപ്പാണ് നടത്തിയിരിക്കുന്നത്.
അക്കൗണ്ട് ഉടമകള്ക്കു നല്കുന്ന ചെക്ക് ലീഫുകളുടെ തനിപ്പകര്പ്പ് പ്രിന്റ് ചെയ്തെടുത്ത് അവ ഉപയോഗിച്ചാണ് ഓരോ തവണയും ലക്ഷക്കണക്കിനു രൂപ പിന്വലിച്ചത്. അക്കൗണ്ട് ഉടമകളുടെ ഒപ്പും അനുകരിച്ചു. കൂടുതല് ബാങ്കുകള് ഇത്തരത്തില് തട്ടിപ്പിന് ഇരയായിട്ടുണ്ടെന്നു സംശയിക്കുന്നു. അഞ്ച് ഇടപാടുകളിലായി നടന്ന തട്ടിപ്പിലൂടെയാണ് പണം പിന്വലിക്കപ്പെട്ടിട്ടുള്ളത്.
തട്ടിപ്പിനു പിന്നില് ഉത്തരേന്ത്യ കേന്ദ്രീകരിച്ചുള്ള സംഘമാണെന്നാണു സംശയം. യുപിയിലും മഹാരാഷ്ട്രയിലുമുള്ള ശാഖകളിലെ അക്കൗണ്ടുകളില്നിന്ന് അതേ സ്ഥലങ്ങളിലുള്ള ആളുകള് തന്നെയാണു പണം പിന്വലിച്ചത്. എന്നാല് ചെക്കുകള് ക്ലിയറിങ്ങിനു നല്കിയതു കൊച്ചിയിലും സമീപ പ്രദേശങ്ങളിലുമുള്ള ശാഖകളിലാണ്. അക്കൗണ്ടുകളിലെ പണത്തിന്റെ വിവരവും ഉടമകളുടെ ഒപ്പും തട്ടിപ്പുകാര്ക്കു ലഭിക്കാന് ബാങ്കിലെ ആരുടെയെങ്കിലും സഹായം ലഭിച്ചിട്ടുണ്ടോയെന്ന് അറിയില്ല.
ബാങ്കില്നിന്നു പണം പിന്വലിക്കുമ്പോള് അക്കൗണ്ട് ഉടമയുടെ ഫോണിലേക്കു മെസേജ് വരാറുണ്ട്. എന്നാല് പണം നഷ്ടപ്പെട്ട അക്കൗണ്ടുകളൊന്നും വ്യക്തികളുടേതല്ല; കോളജ്, സ്കൂള്, സൊസൈറ്റികള് തുടങ്ങിയവയുടേതാണ്. അതിനാല് ഇത്തരം മെസേജുകള് ശ്രദ്ധിക്കപ്പെടാതെ പോയതാകാമെന്നു കരുതുന്നു.