റായ്പൂര്: ഛത്തിസ്ഗഢിലെ ആദ്യ ഘട്ട വോട്ടെടുപ്പ് നാളെ. ബസ്തര് , രാജനന്ദ്ഗാവ് മേഖലകളിലായി 18 സീറ്റുകളിലേക്കാണ് തെരഞ്ഞെടുപ്പ് നടക്കുന്നത്. മുഖ്യമന്തി രമണ് സിംഗും രണ്ട് മന്ത്രിമാരും ഉള്പ്പെടെ നിരവധി പ്രമുഖര് ആദ്യഘട്ടത്തില് ജനവിധി തേടും. കഴിഞ്ഞ തവണ കോണ്ഗ്രസിന് 12 ഉം ബിജെപിക്ക് ആറും സീറ്റുകളാണ് ഇവിടെ ലഭിച്ചത്.
ഛത്തിസ്ഗഢില് ആകെയുള്ള 90 സീറ്റില് മാവോയിസ്റ്റ് ഭീഷണിയുള്ള പ്രദേശങ്ങള് മാത്രം തെരഞ്ഞെടുത്താണ് ആദ്യ ഘട്ട പോളിംഗ്. മാവോയിസ്റ്റ് സാന്നിധ്യം ഏറ്റവും രൂക്ഷമായ ബസ്തറില് 12 ഉം രാജ്നന്ദഗാവ് ജില്ലയിലെ ആറും സീറ്റുകളാണിവ.
സംസ്ഥാനത്ത് സിപിഐ മല്സരിക്കുന്ന രണ്ട് മണ്ഡലങ്ങളും ബസ്തര് മേഖലയിലാണ്. കഴിഞ്ഞ തവണ രാജ്യത്ത് തന്നെ ഏറ്റവും കൂടുതല് നോട്ട രേഖപ്പെടുത്തിയ മണ്ഡലങ്ങളില്ചിലതും ബസ്തര് മേഖലയിലാണ്. ദണ്ഡേവാഡ സീറ്റില് ഒമ്പതായിരവും ചിത്രകൂട് സീറ്റില് പതിനായിരവും ആയിരുന്നു കഴിഞ്ഞതവണ നോട്ടയുടെ എണ്ണം.