മുംബൈ: ഐപിഎൽ 14ആം സീസണിൽ ചെന്നൈ സൂപ്പർ കിംഗ്സിന് ആദ്യ ജയം. 6 വിക്കറ്റിന് പഞ്ചാബ് കിംഗ്സിനെയാണ് ചെന്നൈ പരാജയപ്പെടുത്തിയത്. പഞ്ചാബ് മുന്നോട്ടുവച്ച 107 റൺസ് വിജയലക്ഷ്യം 15.4 ഓവറിൽ 4 വിക്കറ്റ് നഷ്ടപ്പെടുത്തി വിജയിക്കുകയായിരുന്നു. 46 റൺസെടുത്ത മൊയീൻ അലിയാണ് ചെന്നൈയുടെ ടോപ്പ് സ്കോറർ. ഫാഫ് ഡുപ്ലെസി 36 റൺസ് നേടി പുറത്താവാതെ നിന്നു. പഞ്ചാബ് കിംഗ്സിനായി മുഹമ്മദ് ഷമി രണ്ട് വിക്കറ്റ് വീഴ്ത്തി.
നന്നായി പന്തെറിഞ്ഞ പഞ്ചാബ് ബൗളർമാരുടെ സമ്മർദ്ദത്തിനു വഴങ്ങി അഞ്ചാം ഓവറിൽ ഋതുരാജ് ഗെയ്ക്‌വാദ് (5) പുറത്തായി. അർഷ്ദീപ് സിംഗിനായിരുന്നു വിക്കറ്റ്. രണ്ടാം വിക്കറ്റിൽ റെയ്നക്ക് പകരം മൊയീൻ അലി എത്തി. ആക്രമിച്ചു കളിച്ച മൊയീൻ ആണ് പഞ്ചാബിനെ മത്സരത്തിൽ നിന്ന് പുറത്താക്കിയത്. ഡുപ്ലെസിക്കൊപ്പം രണ്ടാം വിക്കറ്റിൽ 66 റൺസിന്റെ കൂട്ടുകെട്ടിൽ പങ്കാളിയായ മൊയീൻ കൂറ്റൻ ഷോട്ടിനുള്ള ശ്രമത്തിനിടെ മുരുഗൻ അശ്വിനു വിക്കറ്റ് സമ്മാനിച്ച് മടങ്ങുകയായിരുന്നു.
ടോസ് നഷ്ടമായി ബാറ്റിംഗിനിറങ്ങിയ പഞ്ചാബ് നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 106 റൺസാണ് നേടിയത്.
